ಕರ್ನಾಟಕ ಭಾಗ್ಯ ವಿಶೇಷ

ನಟ ಯಶಸ್ ಸೂರ್ಯ ಸದ್ಯ ಯೋಗರಾಜ್ ಭಟ್ ನಿರ್ದೇಶನದ ಗರಡಿ ಸಿನಿಮಾದಲ್ಲಿ ರೆಸ್ಲರ್ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಪಾತ್ರದ ಕುರಿತು ಮಾತನಾಡಿರುವ ಯಶಸ್ “ನಾನು ರೆಸ್ಲರ್ ಗರಡಿ ಸೂರಿ ಪಾತ್ರ ಮಾಡುತ್ತಿದ್ದೇನೆ. ನಾನು ರೆಸ್ಲರ್ ಗಳಿಗೆ ಪೌಷ್ಟಿಕ ಆಹಾರ ತಯಾರಿಸುವ ಚೆಫ್ ಆಗಿರುತ್ತೇನೆ. ನಾನು ಹೇಗೆ ರೆಸ್ಲಿಂಗ್ ಗೆ ಇಳಿಯುತ್ತೇನೆ ಎಂಬುದು ಕಥೆಯಲ್ಲಿ ಕುತೂಹಲ ಉಂಟು ಮಾಡುತ್ತದೆ” ಎಂದಿದ್ದಾರೆ. ಪಾತ್ರಕ್ಕಾಗಿ ಹಲವು ರೀತಿಯ ತಯಾರಿಗಳನ್ನು ಮಾಡಿದ್ದಾರೆ ಯಶಸ್ ” ಗರಡಿ ಮನೆಗಳ ತವರು ಮನೆ ಆಗಿರುವ ಮೈಸೂರಿನಲ್ಲಿ ನಾವು ಒಂದು ತಿಂಗಳಿನ ಕಾಲ ನೆಲೆಸಿದ್ದೆವು. ರೆಸ್ಲರ್ ದೇಸಿ ಗೌಡರು ಅಡಿಯಲ್ಲಿ ನಾನು ತರಬೇತಿ ಪಡೆದಿದ್ದೆ. ನಾನು ಜಿಮ್ ನಲ್ಲಿ ಬೆಳಿಗ್ಗೆ ಹಾಗೂ ಸಂಜೆ ಎರಡು ಗಂಟೆ ತರಬೇತಿ ಪಡೆಯುತ್ತಿದ್ದೆ. ರೆಸ್ಲಿಂಗ್ ಗೆ ಸಿದ್ಧತೆ ಮಾಡುತ್ತಿದ್ದೆ. ಆರಂಭದಲ್ಲಿ ನಾವು ಮಟ್ಟಿ ಎಂಬ ಮಣ್ಣಿಗೆ ಪೂಜೆ ಮಾಡುತ್ತಿದ್ದೆವು. ಈ ಹಂತ ತುಂಬಾ ಸಮಯ ತೆಗೆದುಕೊಳ್ಳುತ್ತದೆ ಏಕೆಂದರೆ ಅವರು ಒಂದು ರೀತಿಯ ಮಣ್ಣು, ಎಣ್ಣೆ ಹಾಗೂ ತುಪ್ಪವನ್ನು ಮಿಶ್ರಣ ಮಾಡುತ್ತಾರೆ. ಇನ್ನೊಂದು ಆಸಕ್ತಿಯ ವಿಷಯ ಎಂದರೆ ನಾವು ಗರಡಿಯಲ್ಲಿ ಸ್ನಾನ ಮಾಡುತ್ತಿದ್ದೆವು. ಡಯಟ್ ನಲ್ಲಿ ಪ್ರೊಟೀನ್ ಗೆ ಮಹತ್ವ ನೀಡಬೇಕು. ಮಸಾಲೆಯ ಆಹಾರ ತಿನ್ನಬಾರದು”ಎಂದಿದ್ದಾರೆ. ಚಿತ್ರದ ಪ್ರಮುಖ ಅಂಶವಾಗಿರುವ ರೆಸ್ಲಿಂಗ್ ಗಾಗಿ ನಗರದ ಹೊರಗಡೆ ಸೆಟ್ ನಲ್ಲಿ ಶೂಟಿಂಗ್ ಮಾಡಲಾಗಿದೆ. ಸೋನಾಲ್ ಮೊಂತೆರೋ ನಾಯಕಿಯಾಗಿ ನಟಿಸುತ್ತಿದ್ದಾರೆ. ತುಂಬಾ ಸಮಯದ ಬಳಿಕ ಬಿ.ಸಿ ಪಾಟೀಲ್ ರೆಸ್ಲರ್ ಆಗಿ ನಟಿಸಿದ್ದಾರೆ. ಸಚಿವ ಎಸ್.ಟಿ ಸೋಮಶೇಖರ್ ಕೂಡಾ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

‘ವಿಕ್ರಮ್’, ಸದ್ಯ ತಮಿಳಿನಲ್ಲಿ ಬಹು ನಿರೀಕ್ಷಿತ ಚಿತ್ರ. ಭಾರತ ಚಿತ್ರರಂಗದ ದಿಗ್ಗಜ ನಟರುಗಳಲ್ಲಿ ಒಬ್ಬರಾದ ಕಮಲ್ ಹಾಸನ್ ನಟನೆಯ 232ನೇ ಚಿತ್ರವಿದು. ಇದೇ ಜೂನ್ 3ರಂದು ತೆರೆಮೇಲೆ ಬರಲು ಸಿದ್ದವಾಗಿರೋ ಈ ಸಿನಿಮಾದ ಬಗ್ಗೆ ಹೆಚ್ಚಿನ ಮಾಹಿತಿ ಇನ್ನು ಲಭ್ಯವಾಗದಿದ್ದರೂ, ಆಗಾಗ ಸುಳಿವುಗಳು ಸಿಗುತ್ತಲಿರುತ್ತವೆ. ಈಗಲೂ ಸಹ ಚಿತ್ರದ ತಾರಾಗಣದ ಬಗೆಗಿನ ಸುದ್ದಿಯೊಂದು ಹೊರಬಿದ್ದಿದೆ. ‘ವಿಕ್ರಮ್’ ಸಿನಿಮಾದಲ್ಲಿ ಕಮಲ್ ಹಾಸನ್ ಜೊತೆಗೆ ತಮಿಳಿನ ಮನೋಜ್ಞ ನಟ ವಿಜಯ್ ಸೇತುಪತಿ, ಅರ್ಜುನ್ ದಾಸ್, ಮಲಯಾಳಂನ ಫಹಾದ್ ಫಾಸಿಲ್ ಮುಂತಾದವರು ನಟಿಸುತ್ತಿದ್ದಾರೆ. ಈ ಸಾಲಿಗೆ ಕನ್ನಡದ ಸುಂದರಿ ಶಾನ್ವಿ ಶ್ರೀವಾಸ್ತವ ಸೇರಿಕೊಳ್ಳುತ್ತಿದ್ದಾರೆ. ಕನ್ನಡದ ‘ಮಾಸ್ಟರ್ ಪೀಸ್’, ‘ಮಫ್ತಿ’, ‘ಅವನೇ ಶ್ರೀಮನ್ನಾರಾಯಣ’ ಮುಂತಾದ ಚಿತ್ರಗಳಿಂದ ಪ್ರಸಿದ್ದರಾಗಿರುವ ಶಾನ್ವಿ ಇದೀಗ ಕಮಲ್ ಹಾಸನ್ ಅವರ ಜೋಡಿಯಾಗಿ ನಟಿಸಲು ಸಜ್ಜಾಗಿದ್ದಾರೆ. ಚಿತ್ರದಲ್ಲಿ ಬರುವಂತಹ ಫ್ಲಾಶ್ ಬ್ಯಾಕ್ ಕಥೆಯೊಂದರ ಮುಖ್ಯಪಾತ್ರವಾಗಿ, ಕಮಲ್ ಹಾಸನ್ ಅವರ ಜೋಡಿಯಾಗಿ ಕಾಣಿಸಿಕೊಳ್ಳಲಿದ್ದಾರಂತೆ ಶಾನ್ವಿ. ಈ ಫ್ಲಾಶ್ ಬ್ಯಾಕ್ ಸನ್ನಿವೇಶಗಳಿಗಾಗಿ ವಿಶೇಷ ತಂತ್ರಜ್ಞಾನಗಳನ್ನು ಬಳಸಿ, ಕಮಲ್ ಹಾಸನ್ ಅವರನ್ನು ಎಳೆಯ ವಯಸ್ಸಿನವರಂತೆ ತೋರಿಸಲಾಗಿದೆ ಎಂಬ ಸುದ್ದಿಯಿದೆ. ತಮಿಳಿನ ‘ಕೈಥಿ’ ಹಾಗು ‘ಮಾಸ್ಟರ್’ ಚಿತ್ರಗಳ ಖ್ಯಾತಿಯ ನಿರ್ದೇಶಕರಾದ ಲೋಕೇಶ್ ಕಣಗರಾಜ್ ಅವರೇ ಈ ಸಿನಿಮಾದ ಸೃಷ್ಟಿಕರ್ತರು. ಈಗಾಗಲೇ ಅತ್ಯುತ್ತಮ ಚಿತ್ರಗಳನ್ನ ನೀಡಿರೋ ನಿರ್ದೇಶಕರು ಇವರಾಗಿರುವುದರಿಂದ, ಇವರ ಹಾಗು ಕಮಲ್ ಹಾಸನ್ ಜೋಡಿಯ ‘ವಿಕ್ರಮ್’ ಚಿತ್ರದ ಮೇಲಿನ ನಿರೀಕ್ಷೆಗಳು ಗಗನಕ್ಕೇರಿವೆ. ಅತಿ ನಿಷ್ಣಾತ ಸಂಗೀತ ನಿರ್ದೇಶಕ ಅನಿರುಧ್ ಅವರ ಕೈಚಳಕ ಚಿತ್ರದಲ್ಲಿರಲಿದೆ. ಕಮಲ್ ಹಾಸನ್ ಅವರು ತಮ್ಮದೇ ಸಂಸ್ಥೆಯಾದ ‘ರಾಜ್ ಕಮಲ್ ಫಿಲಂಸ್ ಇಂಟರ್ನ್ಯಾಷನಲ್’ ಅಡಿಯಲ್ಲಿ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಚಿತ್ರ ಜೂನ್ 3ರಿಂದ ಅಭಿಮಾನಿಗಳನ್ನು ರಂಜಿಸಲು ಬರಲಿದೆ.

ತುಳು ಸಿನಿಮಾಗಳ ಮೂಲಕ ನಟನಾ ಕೆರಿಯರ್ ಆರಂಭಿಸಿದ ನಟಿ ರಚನಾ ರೈ ಈಗ ವಾಮನ ಸಿನಿಮಾ ಮೂಲಕ ಚಂದನವನಕ್ಕೆ ಕಾಲಿಡುತ್ತಿದ್ದಾರೆ. ಧನವೀರ್ ಅವರಿಗೆ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿರುವ ರಚನಾ ಮೊದಲ ಹಂತದ ಶೂಟಿಂಗ್ ನಲ್ಲಿ ಭಾಗವಹಿಸಿದ್ದಾರೆ. ಶಂಕರ್ ರಮಣ್ ಈ ಚಿತ್ರದ ನಿರ್ದೇಶನ ಮಾಡುತ್ತಿದ್ದಾರೆ. ಸಿನಿಮಾದ ಬಗ್ಗೆ ಮಾತನಾಡಿರುವ ರಚನಾ “ನನ್ನ ಮೊದಲ ಸಿನಿಮಾದಲ್ಲಿ ಇಂತಹ ಒಳ್ಳೆಯ ತಂಡದ ಜೊತೆ ಕೆಲಸ ಮಾಡುತ್ತಿರುವುದಕ್ಕೆ ಖುಷಿಯಾಗಿದೆ. ಫೈವ್ ಸ್ಟಾರ್ ಹೋಟೆಲ್ ನಲ್ಲಿ ರಿಸೆಪ್ಷನಿಸ್ಟ್ ಆಗಿ ಕೆಲಸ ಮಾಡುವ ಕಸ್ಟಮ್ ಆಫೀಸರ್ ಮಗಳು ಪಾತ್ರ ಮಾಡುತ್ತಿದ್ದೇನೆ. ಅವಳು ಹುಡುಗನೊಂದಿಗೆ ಪ್ರೀತಿಯಲ್ಲಿ ಬೀಳುತ್ತಾಳೆ. ತನ್ನ ಲವ್ ಗಾಗಿ ಹೇಗೆ ಹೋರಾಟ ಮಾಡುತ್ತಾಳೆ ಎಂಬುದಾಗಿದೆ. ಇಲ್ಲಿ ನನ್ನ ನಟನಾ ಸಾಮರ್ಥ್ಯ ಪ್ರದರ್ಶಿಸಲು ಅವಕಾಶ ಇದೆ. ಇದೇ ನಾನು ಸಿನಿಮಾ ಒಪ್ಪಿಕೊಳ್ಳಲು ಕಾರಣವಾಗಿದೆ” ಎಂದು ಹೇಳಿದ್ದಾರೆ. ರಚನಾ ನಟಿಯಲ್ಲದೇ ರಾಷ್ಟ್ರ ಮಟ್ಟದ ಬ್ಯಾಡ್ಮಿಂಟನ್ ಆಟಗಾರ್ತಿ ಹಾಗೂ ಲೇಖಕಿಯೂ ಹೌದು. “ನಾನು ನಟನೆಯನ್ನು ಪ್ರೀತಿಸುತ್ತೇನೆ ಎಂದು ಅರಿತುಕೊಂಡೆ. ವೇದಿಕೆಗಳಲ್ಲಿ ಶೋಗಳನ್ನು ಕೊಟ್ಟಿದ್ದೇನೆ. ಇದು ನನಗೆ ಇಲ್ಲಿ ಉತ್ತಮ ಭವಿಷ್ಯ ಇದೆ ಎಂಬ ಆತ್ಮವಿಶ್ವಾಸ ನೀಡಿತು” ಎಂದು ಹೇಳುವ ರಚನಾ ಕಿರುತೆರೆ ನಟ ಕಿರಣ್ ರಾಜ್ ಅವರೊಂದಿಗೆ ಚಿಕನ್ ಪುಳಿಯೋಗರೆ ಸಿನಿಮಾದಲ್ಲಿ ಬಣ್ಣ ಹಚ್ಚಿದ್ದಾರೆ.

ಕೆಜಿಎಫ್ ಚಾಪ್ಟರ್ 2 ಇದೀಗ ಸಾವಿರ ಕೋಟಿಗಳ ಒಡೆಯ. ಪ್ರಪಂಚದಾದ್ಯಂತ 1000ಕೋಟಿಗಳ ಗಳಿಕೆ ಕಂಡು, ಮುಂದಿರುವ ಎಲ್ಲ ದಾಖಲೆಗಳನ್ನ ಮುರಿಯಲು ಸಾಗುತ್ತಿದೆ. 1000 ಕೋಟಿ ಕಂಡ ನಾಲ್ಕನೇ ಭಾರತೀಯ ಚಿತ್ರ ಹಾಗು ಮೊದಲನೇ ಕನ್ನಡ ಚಿತ್ರ ಎಂಬ ಹಿರಿಮೆಗೆ ಪಾತ್ರವಾಗಿದೆ ಪ್ರಶಾಂತ್ ನೀಲ್ ಅವರ ಈ ಕಲಾಕುಸುರಿ. ಎಲ್ಲೆಡೆ ಅದ್ಭುತ ಪ್ರತಿಕ್ರಿಯೆಗಳನ್ನ ಪಡೆಯುತ್ತಿರೋ ಚಿತ್ರ, ಚಿತ್ರಮಂದಿರಗಳಲ್ಲಿ ಯಶಸ್ವಿ ಪ್ರದರ್ಶನಗಳನ್ನೂ ಕಾಣುತ್ತಿದೆ. ರಾಕಿಂಗ್ ಸ್ಟಾರ್ ಯಶ್ ಅವರ ಅಭಿಮಾನಿ ಬಳಗವು ಸಹ ದೊಡ್ಡದಾಗಿ, ಪ್ರಪಂಚದಾದ್ಯಂತ ವಿಸ್ತರಿಸುತ್ತಿದೆ. ಈವರೆಗೆ ಹಿಂದಿಯಲ್ಲಿ ಸುಮಾರು 370ಕೋಟಿ ಗಳಿಸಿರುವ ಕೆಜಿಎಫ್ ಚಾಪ್ಟರ್ 2 ಭಾರತೀಯ ಚಿತ್ರರಂಗದ ದಾಖಲೆಗಳಲ್ಲೇಲ್ಲಾ ಅಗ್ರಸ್ಥಾನದಲ್ಲಿರುವ ‘ದಂಗಲ್’ ಬರೆದ ಇತಿಹಾಸವನ್ನು ಮರಳಿ ಬರೆಯಬಹುದು. ಪ್ರಪಂಚದಾದ್ಯಂತ 2000 ಕೋಟಿ ಗಳಿಸಿದ್ದ ‘ದಂಗಲ್’ ಹಿಂದಿಯಲ್ಲಿ ಗಳಿಸಿದ್ದು 387 ಕೋಟಿ ಮಾತ್ರ. ಸಾವಿರ ಕೋಟಿ ಕಲೆಕ್ಷನ್ ಸಾಲಿನಲ್ಲಿ ಮೊದಲ ಮೂರು ಚಿತ್ರಗಳಾದ ‘ದಂಗಲ್’, ‘ಬಾಹುಬಲಿ-2’, ‘RRR’ ನಂತರ ‘ಕೆಜಿಎಫ್ ಚಾಪ್ಟರ್ 2’ ಬಂದು ಕೂತಿದೆ. ಇಷ್ಟೆಲ್ಲಾ ದಾಖಲೆಗಳ ಸರದಾರನಾದ ಕೆಜಿಎಫ್ ಚಾಪ್ಟರ್ 2, ಬಾಲಿವುಡ್ ನಲ್ಲೂ ಭಯ ಹುಟ್ಟಿಸಿದೆಯಂತೆ. ಹೀಗೆಂದು ಹೇಳಿದವರು ಬಾಲಿವುಡ್ ನ ಸ್ಟಾರ್ ನಟ, ಅಮೀರ್ ಖಾನ್. “ಕೆಜಿಎಫ್ ಚಿತ್ರದ ಅಬ್ಬರ ನೋಡಿ ಹೆದರಿದ್ದೆ. ಚಿತ್ರದ ಕಥೆ ಅದ್ಭುತವಾಗಿದೆ. ಹಾಗಾಗಿ ಮೊದಲ ಭಾಗಕ್ಕಿಂತ ಹೆಚ್ಚೇ ಎರಡನೇ ಭಾಗ ಮೆಚ್ಚುಗೆ ಪಡೆಯುತ್ತಿದೆ” ಎಂದಿದ್ದಾರೆ ಅಮೀರ್ ಖಾನ್. ಇತ್ತೀಚೆಗಿನ ಖಾಸಗಿ ಸಂದರ್ಶನವೊಂದರಲ್ಲಿ ಕೆಜಿಎಫ್ ಬಗೆಗಿನ ಈ ಮಾತುಗಳನ್ನ ಹೇಳಿದ್ದಾರೆ ಅಮೀರ್ ಖಾನ್. ಅಮೀರ್ ಖಾನ್ ಅವರ ‘ಲಾಲ್ ಸಿಂಗ್ ಛಡ್ಡ’ ಕೆಜಿಎಫ್ ಸಮೀಪವೇ ಬಿಡುಗಡೆಯಗೋ ಸುದ್ದಿಯಿತ್ತು. ಆದರೆ ಚಿತ್ರತಂಡ ಬಿಡುಗಡೆಯನ್ನ ಮುಂದೂಡಿದ್ದರು. ಈಗಾಗಲೇ ಬಾಲಿವುಡ್ ನಲ್ಲಿ ಅಜಯ್ ದೇವಗನ್ ಅವರ ‘ರನ್ ವೇ 34’ ಹಾಗು ಟೈಗರ್ ಶ್ರಫ್ ಅವರ ‘ಹೀರೋಪಂತಿ 2’ ಕೆಜಿಎಫ್ ಚಾಪ್ಟರ್ 2 ಎದುರು ನೆಲಕಚ್ಚಿದ್ದು, ಕೆಜಿಎಫ್ ನ ಅಬ್ಬರ ಬಾಲಿವುಡ್ ಸೇರಿದಂತೆ ಎಲ್ಲೆಡೆ ಭರದಿಂದ ನಡೆಯುತ್ತಿದೆ.

‘ಸಲಗ’ ಎಂಬ ಒಂದೇ ಒಂದು ಚಿತ್ರ ದುನಿಯಾ ವಿಜಿ ಅವರ ಸಿನಿಪಯಣವನ್ನೇ ಬದಲಾಯಿಸಿತು ಎಂದರೆ ತಪ್ಪಾಗಲಾಗದು. ಸಾಲು ಸಾಲು ಚಿತ್ರಗಳು ಸೋಲು ಕಂಡಾಗ ಇನ್ನೇನು ದುನಿಯಾ ವಿಜಯ್ ಅವರು ಸಿನಿಮಾರಂಗದಿಂದ ಹೊರಹೊರಾಡುತ್ತಾರೆ ಎಂದು ಎಲ್ಲರು ಗುಸು ಗುಸು ಎನ್ನುತ್ತಿದ್ದರು. ಅಂತ ಸಮಯದಲ್ಲಿ ವಿಜಿ ಇಟ್ಟ ಹೆಜ್ಜೆ ‘ಸಲಗ’. ಚಿತ್ರದ ಶೀರ್ಷಿಕೆಯೇ ಹೇಳುವಂತೆ ಇದು ಆನೆ ನಡೆದ ದಾರಿಯೇ ಆಗಿತ್ತು. ‘ಸಲಗ’ ಚಿತ್ರದಿಂದ ನಟನಾಗಿ ಮಾತ್ರವಲ್ಲದೆ ನಿರ್ದೇಶಕನಾಗಿಯೂ ಅದ್ಭುತ ಯಶಸ್ಸು ಕಂಡ ವಿಜಿಗೆ ಹಿಂತಿರುಗಿ ನೋಡುವ ಪ್ರಮೇಯವೇ ಬರುತ್ತಿಲ್ಲ. ದುನಿಯಾ ವಿಜಿ ಅವರ ಮುಂದಿನ ಚಿತ್ರವನ್ನ ಮತ್ತೊಮ್ಮೆ ಅವರೇ ನಿರ್ದೇಶನ ಮಾಡುತ್ತಿದ್ದು, ಚಿತ್ರದ ಶೀರ್ಷಿಕೆಯು ಎಲ್ಲರೆದುರು ಇಟ್ಟಾಗಿದೆ. ‘ಭೀಮ’ನಾಗಿ ಅಭಿಮಾನಿಗಳ ಮುಂದೆ ಬರಲು ಭರದಿಂದ ತಯಾರಿ ಮಾಡಿಕೊಳ್ಳುತ್ತಿರುವ ವಿಜಿ ಇದೀಗ ತೆಲುಗುವಿನ ದಿಗ್ಗಜರೊಬ್ಬರೊಂದಿಗೆ ನಟಿಸಲು ಸಜ್ಜಾಗಿದ್ದಾರೆ. ವಿಜಿ ಅವರಿಗೆ ನಟಿಸಲು ಬಂದಿರುವುದು ಬೇರಾರಿಂದಲೂ ಅಲ್ಲದೇ, ಬಾಲಯ್ಯ ಅವರು ನಟಿಸುತ್ತಿರುವ ಚಿತ್ರವೊಂದರಿಂದ. ನಂದಮೂರಿ ಬಾಲಕೃಷ್ಣ ಯಾನೆ ಬಾಲಯ್ಯನವರ ಮುಂದಿನ ಚಿತ್ರದಲ್ಲಿ ವಿಜಿ ಮುಖ್ಯ ಪಾತ್ರವೊಂದಕ್ಕೆ ಜೀವ ತುಂಬಲಿದ್ದಾರೆ. ಗೋಪಿಚಂದ್ ಮಲ್ಲಿನೇನಿ ನಿರ್ದೇಶನದ ಈ ಚಿತ್ರದಲ್ಲಿ ದುನಿಯಾ ವಿಜಯ್ ಖಳನಾಯಕನಾಗಿ ಕಾಣಿಸಕೊಳ್ಳಲಿದ್ದಾರೆ. ಮಸಲಿ ಮಗುಡು ಪ್ರತಾಪ್ ರೆಡ್ಡಿ ಎಂಬ ರಗಡ್ ಪಾತ್ರವೊಂದಕ್ಕೆ ಜೀವ ತುಂಬಲಿದ್ದಾರೆ ವಿಜಿ. ಇದೀಗ ಚಿತ್ರತಂಡ ಚಿತ್ರದ ಶೀರ್ಷಿಕೆಯನ್ನ ನಿರ್ಧರಿಸಿದೆ. ಬಾಲಯ್ಯನವರ 107ನೇ ಚಿತ್ರವಾಗಿರುವ ಈ ಸಿನಿಮಾಗೆ ‘ಅಣ್ಣಗಾರು’ ಎಂಬ ಪವರ್ ಫುಲ್ ಟೈಟಲ್ ಇಡಲಾಗಿದೆ. ‘ಮೈತ್ರಿ ಮೂವೀಸ್’ ನಿರ್ಮಾಣದಲ್ಲಿ ಮೂಡಿಬರುತ್ತಿರೋ ಈ ಚಿತ್ರದಲ್ಲಿ ಬಾಲಯ್ಯನವರಿಗೆ ನಾಯಕಿಯಾಗಿ ಶೃತಿ ಹಾಸನ್ ಆಯ್ಕೆಯಾಗಿದ್ದಾರೆ. ವರಲಕ್ಷ್ಮಿ ಶರತ್ ಕುಮಾರ್ ಹಾಗು ಲಾಲ್ ಅವರು ಕೂಡ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ನಟಿಸಲಿದ್ದಾರೆ.ತಮನ್ ಎಸ್ ಅವರ ಸಂಗೀತ ಚಿತ್ರಕ್ಕೆ ಕಳೆ ನೀಡಲಿದೆ. ‘ಬಾಲಯ್ಯನವರ ಜೊತೆ ನಟಿಸಲು ತುಂಬಾ ಹೆಮ್ಮೆಯಾಗುತ್ತದೆ. ಈ ಪಾತ್ರಕ್ಕೆ ನನ್ನನ್ನು ಆಯ್ಕೆ ಮಾಡಿದ್ದಕ್ಕಾಗಿ ನಿರ್ದೇಶಕರಿಗೂ, ಅವಕಾಶಕ್ಕಾಗಿ ಮೈತ್ರಿ ಮೂವೀಸ್ ಹಾಗು ಬಾಲಯ್ಯನವರಿಗೂ ಧನ್ಯವಾದಗಳು” ಎಂದಿದ್ದಾರೆ ವಿಜಿ.

ಸದ್ಯ ಬೇಡಿಕೆಯ ನಟಿಯರಲ್ಲಿ ಒಬ್ಬರಾಗಿರುವ ಶ್ರೀಲೀಲಾ ಹಲವು ಸಿನಿಮಾ ಒಪ್ಪಿಕೊಂಡಿದ್ದಾರೆ. ಕಿಸ್ ಸಿನಿಮಾ ಮೂಲಕ ಕೆರಿಯರ್ ಆರಂಭಿಸಿದ ಶ್ರೀಲೀಲಾ ಈಗ ಟಾಲಿವುಡ್ ನಲ್ಲಿ ಬೇಡಿಕೆಯ ನಟಿ.“ನಾನು ಚಿಕ್ಕವಳಿದ್ದಾಗಿನಿಂದಲೂ ತಾಳ್ಮೆ ಎಂಬುದು ನನ್ನ ದೊಡ್ಡ ಗುಣಗಳಲ್ಲಿ ಒಂದಾಗಿದೆ. ಅನೇಕ ನಟರು ಇದನ್ನು ಹೇಳುತ್ತಾರೆಂದು ನನಗೆ ತಿಳಿದಿದೆ. ಆದರೆ ನಿಜವಾಗಿ ಸಿನಿಮಾ ಕ್ಷೇತ್ರಕ್ಕೆ ನಾನು ಆಕಸ್ಮಿಕವಾಗಿ ಕಾಲಿಟ್ಟೆ. ನಾನು ನನ್ನ ನಡೆಗಳ ಬಗ್ಗೆ ಪ್ಲಾನ್ ಮಾಡಿಲ್ಲ” ಎಂದಿದ್ದಾರೆ. “ನಾನು ದಿನವೂ ಶಾಲೆಗೆ ಹೋಗುವ ಹುಡುಗಿಯಾಗಿದ್ದೆ. ಕುಟುಂಬದಲ್ಲಿ ಫಂಕ್ಷನ್ ನಂತರ ಫೋಟೋ ತೆಗೆಯಲಾಗುತ್ತಿತ್ತು. ಭುವನ್ ಗೌಡ ಫೋಟೋ ತೆಗೆಯುತ್ತಿದ್ದರು. ಅವರು ಸಿನಿಮಾಟೋಗ್ರಾಫರ್ ಆಗುವ ಮೊದಲು ಉತ್ತಮ ಫೋಟೋಗ್ರಾಫರ್ ಆಗಿದ್ದರು. ಅವರು ಸೋಶಿಯಲ್ ಮೀಡಿಯಾದಲ್ಲಿ ಫೋಟೋ ಶೇರ್ ಮಾಡುತ್ತಿದ್ದರು. ಅರ್ಜುನ್ ಅಣ್ಣ ಇದನ್ನು ನೋಡಿ ಅಮ್ಮನ ಬಳಿ ಮಾತನಾಡಿ ಮನೆಗೆ ಬಂದರು. ನಾನು ಅತಿಥಿಗಳನ್ನು ರಂಜಿಸಲು ಡ್ಯಾನ್ಸ್ , ಹಾಡು ಹೀಗೆ ಜನರನ್ನು ನಗಿಸಲು ಬೇಕಾದ ರಂಜನೆ ಮಾಡುತ್ತಿದ್ದೆ. ಅರ್ಜುನ್ ಬಂದಾಗಲೂ ಹೀಗೆ ಮಾಡಿದ್ದೆ. ಹೀಗಾಗಿ ನನ್ನನ್ನು ಕಿಸ್ ಸಿನಿಮಾಕ್ಕೆ ನಾಯಕಿಯಾಗಿ ಆಯ್ಕೆ ಮಾಡಿದರು ಅನಿಸುತ್ತೆ” ಎಂದು ನಗುತ್ತಾರೆ. “ಮನೆಯಲ್ಲಿ ಕೆಲವರು ಒಪ್ಪಲಿಲ್ಲ. ಇನ್ನು ಕೆಲವರು ಎಲ್ಲರಿಗೂ ಈ ಅವಕಾಶ ಸಿಗಲ್ಲ ಎಂದರು. ನನ್ನ ತಾಯಿಗೆ ಅವರು ಓದುತ್ತಿರುವಾಗ ಸಿನಿಮಾ ಅವಕಾಶಗಳು ಬಂದಿದ್ದವು. ಆದರೆ ಅವರು ಇದನ್ನು ತೆಗೆದುಕೊಂಡು ಇರಲಿಲ್ಲ. ನನಗೆ ಅವಕಾಶ ಬಂದಾಗ ಅಜ್ಜನ ಬಳಿ ಕೇಳಿದೆ. ಅವರು ಆಶೀರ್ವಾದ ಮಾಡಿದರು. ಅವರು ಓದನ್ನು ಒಳಗೊಂಡಂತೆ ಜೀವನದಲ್ಲಿ ಎಲ್ಲವನ್ನೂ ಬ್ಯಾಲೆನ್ಸ್ ಮಾಡಿಕೊಂಡು ಹೋಗುವಂತೆ ಸಲಹೆ ಕೊಟ್ಟರು” ಎನ್ನುತ್ತಾರೆ ಶ್ರೀಲೀಲಾ. ಹತ್ತನೆಯ ತರಗತಿಯಲ್ಲಿ ಮೊದಲ ಸಿನಿಮಾ ಮಾಡಿದ್ದ ಶ್ರೀಲೀಲಾ ಅವರಿಗೆ ಶೂಟಿಂಗ್ ಮುಗಿಸಿ ಬಂದಾಗ ರಜೆ ಎಂದು ಅನಿಸುತ್ತಿತ್ತಂತೆ. ನನಗೆ ಸಿನಿಮಾ ಕುರಿತು ಐಡಿಯಾ ಇರಲಿಲ್ಲ. ಸ್ಕೂಲ್ ಮುಗಿಸಿ ಬಂದು ಈಜು, ಡ್ಯಾನ್ಸ್ ಮುಂತಾದ ತರಗತಿಗಳಿಗೆ ಹೋಗುತ್ತಿದ್ದೆ. ಥಿಯೇಟರ್ ನಲ್ಲಿ ಸಿನಿಮಾ ನೋಡಿರಲಿಲ್ಲ. ಡ್ಯಾನ್ಸ್ ಕಾರಣಕ್ಕೆ ಮಾಧುರಿ ದೀಕ್ಷಿತ್ ಬಗ್ಗೆ ಗೊತ್ತಿತ್ತು ಎಂದಿದ್ದಾರೆ. ಸದ್ಯ ಕನ್ನಡವಲ್ಲದೇ ತೆಲುಗಿನಲ್ಲಿ ನಟಿಸುತ್ತಿರುವ ಶ್ರೀಲೀಲಾ ಕನ್ನಡದ ಹುಡುಗಿಯಾಗಿ ಗುರುತಿಸಿಕೊಳ್ಳುತ್ತಿರುವುದಕ್ಕೆ ಹೆಮ್ಮೆ ಇದೆ ಎಂದಿದ್ದಾರೆ. ರವಿತೇಜಾ ಅವರೊಂದಿಗೆ ಧಮಾಕಾ ಸಿನಿಮಾದ ಶೂಟಿಂಗ್ ನಲ್ಲಿ ಇರುವ ಶ್ರೀಲೀಲಾ ತಾಯಿ ಸ್ವರ್ಣಲತಾ ಅವರಿಗೆ ಕ್ರೆಡಿಟ್ ನೀಡುತ್ತಾರೆ. “ಅವರು ನನ್ನ ಬೆನ್ನೆಲುಬು. ನನಗೆ ಫೋಕಸ್ ಮಾಡುವುದನ್ನು ಕಲಿಸಿದ್ದಾರೆ. ಮೆಡಿಕಲ್ ಕೋರ್ಸ್ ಮುಗಿಸಿ ಮದುವೆಯಾದರು. ಹದಿನೈದು ವರ್ಷಗಳ ಬಳಿಕ ವೃತ್ತಿಯಾಗಿ ತೆಗೆದುಕೊಂಡಿರಲಿಲ್ಲ. ವೃತ್ತಿಗೆ ಮರಳಿದ ಬಳಿಕ ತಿರುಗಿ ನೋಡಲಿಲ್ಲ. ಈಗ ಬೆಸ್ಟ್ ಡಾಕ್ಟರ್ ಆಗಿದ್ದಾರೆ. ವೃತ್ತಿ ಹಾಗೂ ವೈಯಕ್ತಿಕ ಬದುಕನ್ನು ಸಮತೋಲನದಿಂದ ನಡೆಸಲು ನನಗೆ ಕಲಿಸಿದ್ದಾರೆ” ಎಂದಿದ್ದಾರೆ. ಮೆಡಿಕಲ್ ಕೋರ್ಸ್ ಕಲಿತಿದ್ದನ್ನು ಹಾಳಾಗಲು ಬಿಡುವುದಿಲ್ಲ. ಭವಿಷ್ಯದಲ್ಲಾದರೂ ಈ ವೃತ್ತಿ ಮಾಡುತ್ತೇನೆ. ನನಗೆ ಜನರಿಗೆ ಸಹಾಯ ಮಾಡಲು ಇಷ್ಟ ಎಂದಿದ್ದಾರೆ. ಇಶಾ ಫೌಂಡೇಶನ್ ನ ಮಹಾ ಶಿವರಾತ್ರಿ ಕಾರ್ಯಕ್ರಮದಲ್ಲಿ ಕಾಣಿಸಿಕೊಂಡಿರುವ ಶ್ರೀಲೀಲಾ ತುಂಬಾ ಜನ ನಾನು ಈ ವಯಸ್ಸಿನಲ್ಲಿ ಆಧ್ಯಾತ್ಮಿಕದತ್ತ ವಾಲಿರುವುದಕ್ಕೆ ಆಶ್ಚರ್ಯಗೊಂಡಿದ್ದಾರೆ. ಇದಕ್ಕೆ ವಯಸ್ಸಿನ ಹಂಗಿಲ್ಲ ಎಂದಿದ್ದಾರೆ.

ಸೆಂಚುರಿ ಸ್ಟಾರ್ ಶಿವರಾಜ್ ಕುಮಾರ್ ಅವರು ಸಿನಿರಂಗದಲ್ಲಿ ಬ್ಯುಸಿಯಾಗಿದ್ದಾರೆ. ಇದರ ಜೊತೆಗೆ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಡ್ಯಾನ್ಸ್ ರಿಯಾಲಿಟಿ ಶೋ ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್ ನ ತೀರ್ಪುಗಾರರಾಗಿ ಕಿರುತೆರೆಯಲ್ಲಿ ಮೋಡಿ ಮಾಡುತ್ತಿದ್ದಾರೆ. ಇದರ ಜೊತೆಗೆ ಸೆಂಚುರಿ ಸ್ಟಾರ್ ಹೊಸದಾಗಿರುವ ಪ್ರಯತ್ನಕ್ಕೆ ಮುಂದಾಗಿದ್ದಾರೆ. ಅರೇ, ಅದ್ಯಾವ ಹೊಸ ಪ್ರಯತ್ನ ಎಂದು ಆಲೋಚಿಸುತ್ತಿದ್ದೀರಾ? ಅಂದ ಹಾಗೇ ನಿಮ್ಮ ನೆಚ್ಚಿನ ಸೆಂಚುರಿ ಸ್ಟಾರ್ ಇದೀಗ ವೆಬ್ ಸಿರೀಸ್ ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಶಿವರಾಜ್ ಕುಮಾರ್ ಅವರ ಮಗಳು ನಿವೇದಿತಾ ಹೊಸ ವೆಬ್ ಸಿರೀಸ್ ಒಂದನ್ನು ನಿರ್ಮಾಣ ಮಾಡುತ್ತಿದ್ದು ಅದರಲ್ಲಿ ನಟಿಸುವ ಮೂಲಕ ವೆಬ್ ಸಿರೀಸ್ ಜಗತ್ತಿಗೆ ಕಾಲಿಡಲಿದ್ದಾರೆ ಶಿವಣ್ಣ. ಶಿವರಾಜ್ ಕುಮಾರ್ ಅವರ “ಶ್ರೀ ಮುತ್ತು ಸಿನಿ ಸರ್ವಿಸ್” ನಿರ್ಮಾಣ ಸಂಸ್ಥೆಯಿಂದ ವೆಬ್ ಸೀರಿಸ್ ಮೂಡಿಬರುತ್ತಿದ್ದು ಉಳಿದ ಮಾಹಿತಿ ಇನ್ನು ಸಿಗಬೇಕಿದೆ. ಇನ್ನು ಕಥೆ ಈಗಾಗಲೇ ರೆಡಿಯಾಗಿದ್ದು ಶೀಘ್ರದಲ್ಲಿ ಶೂಟಿಂಗ್ ಶುರುವಾಗಲಿದೆ. ಇನ್ನು ಈ ವೆಬ್ ಸಿರೀಸ್ ನ ನಿರ್ದೇಶನ ಯಾರು ಮಾಡಲಿದ್ದಾರೆ, ಶಿವರಾಜ್ ಕುಮಾರ್ ಜೊತೆಗೆ ಬೇರೆ ಯಾರೆಲ್ಲಾ ಅಭಿನಯಿಸುತ್ತಾರೆ ಎಂಬೆಲ್ಲಾ ಪ್ರಶ್ನೆಗಳಿಗೆ ಉತ್ತರ ಸಿಗಬೇಕಿದೆ. ಒಟ್ಟಿನಲ್ಲಿ ಇದೇ ಮೊದಲ ಬಾರಿಗೆ ವೆಬ್ ಸೀರಿಸ್ ನಲ್ಲಿ ನಟಿಸಲಿರುವ ಸೆಂಚುರಿ ಸ್ಟಾರ್ ಅವರನ್ನು ನೋಡಲು ಅಭಿಮಾನಿಗಳು ಕಾತರರಾಗಿದ್ದಾರೆ.

ವಸಿಷ್ಠ ಸಿಂಹ ನಟನೆಯ ಲವ್ ಲಿ ಎನ್ನುವ ಹೊಸ ಸಿನಿಮಾದಲ್ಲಿ ನಟಿಸುತ್ತಿರುವ ವಿಷಯ ಇತ್ತೀಚೆಗಷ್ಟೇ ಬಹಿರಂಗಗೊಳಿಸಿದ್ದರು. ಚೇತನ್ ಕೇಶವ್ ನಿರ್ದೇಶನದ, ಎಂ ಆರ್ ರವೀಂದ್ರ ನಿರ್ಮಾಣದ ಈ ಲವ್ ಲಿ ಸಿನಿಮಾದಲ್ಲಿ ನಾಯಕಿಯಾಗಿ ಕಿರುತೆರೆಯ ಮುದ್ದು ಮಣಿ ಆಯ್ಕೆಯಾಗಿದ್ದಾರೆ. ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಮುದ್ದು ಮಣಿಗಳು ಧಾರಾವಾಹಿಯಲ್ಲಿ ನಾಯಕಿ ದೃಷ್ಟಿ ಆಗಿ ಅಭಿನಯಿಸುತ್ತಿರುವ ಮಲೆನಾಡ ಬೆಡಗಿ ಸಮೀಕ್ಷಾ ಅವರು ಲವ್ ಲಿ ಸಿನಿಮಾದ ನಾಯಕಿಯಾಗಿ ಆಯ್ಕೆಯಾಗಿದ್ದು ವಸಿಷ್ಠ ಸಿಂಹ ಅವರೊಂದಿಗೆ ಅಭಿನಯಿಸಲಿದ್ದಾರೆ.ಇನ್ನು ಸಿನಿಮಾದ ಮುಹೂರ್ತ ಇತ್ತೀಚೆಗಷ್ಟೇ ನಡೆದಿದೆ. ಕಿರುತೆರೆಯ ಜೊತೆಗೆ ಹಿರಿತೆರೆಯನ್ನು ಬ್ಯಾಲೆನ್ಸ್ ಮಾಡಿಕೊಂಡು ಸಾಗುತ್ತಿರುವ ಸಮೀಕ್ಷಾ ಅವರಿಗೆ ಹಿರಿತೆರೆ ಹೊಸದೇನಲ್ಲ. ರಾಗಿಣಿ ದ್ವಿವೇದಿ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ದಿ ಟೆರರಿಸ್ಟ್ ಸಿನಿಮಾದಲ್ಲಿ ರಾಗಿಣಿ ತಂಗಿಯಾಗಿಯಾಗಿ ಬಣ್ಣ ಹಚ್ಚುವ ಮೂಲಕ ಹಿರಿತೆರೆ ಪಯಣ ಶುರು ಮಾಡಿರುವ ಸಮೀಕ್ಷಾ ಮುಂದೆ 96 ಸಿನಿಮಾದಲ್ಲಿ ಜೂನಿಯರ್ ಜಾನು ಆಗಿ ಅಭಿನಯಿಸಿದರು‌‌. ದರ್ಶಿತ್ ಭಟ್ ನಿರ್ದೇಶನದ ಫ್ಯಾನ್ ಸಿನಿಮಾದಲ್ಲಿ ನಟಿಸಿ ಸೈ ಎನಿಸಿಕೊಂಡಿರುವ ಈಕೆ ಪುನೀತ್ ರಾಜ್ ಕುಮಾರ್ ಅಭಿನಯದ ಜೇಮ್ಸ್ ನಲ್ಲಿ ಅಭಿನಯಿಸಿದ್ದರು‌. ಇದೀಗ ಲವ್ ಲಿ ಸಿನಿಮಾದಲ್ಲಿ ಕಾರ್ಪೊರೇಟ್ ಹುಡುಗಿಯಾಗಿ ಮೋಡಿ ಮಾಡಲಿದ್ದಾರೆ.

ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ತ್ರಿನಯನಿ ಧಾರಾವಾಹಿಯಲ್ಲಿ ನಾಯಕ ವಿಶಾಲ್ ಆಗಿ ನಟಿಸುತ್ತಿರುವ ಚಂದು ಬಿ ಗೌಡ ಸದ್ಯದಲ್ಲೇ ತಂದೆಯಾಗುತ್ತಿದ್ದಾರೆ. ಚಂದು ಗೌಡ ಹಾಗೂ ಅವರ ಪತಿ ಶಾಲಿನಿ ನಾರಾಯಣ್ ಚೊಚ್ಚಲ ಮಗುವಿನ ನಿರೀಕ್ಷೆಯಲ್ಲಿ ಇದ್ದಾರೆ. ತನ್ನ ಇನ್ಸಾಗ್ರಾಂ ಖಾತೆಯಲ್ಲಿ ಈ ಸಂತಸದ ವಿಷಯವನ್ನು ಹಂಚಿಕೊಂಡಿರುವ ನಟ ತನ್ನ ಪತ್ನಿಯೊಂದಿಗೆ ಇರುವ ಫೋಟೋ ಹಂಚಿಕೊಂಡಿದ್ದಾರೆ.” ಕುಟುಂಬಕ್ಕೆ ಇನ್ನೊಬ್ಬ ಸದಸ್ಯನನ್ನು ಸ್ವಾಗತಿಸಲು ಎಲ್ಲಾ ಸಿದ್ದವಾಗಿದೆ” ಎಂದು ಬರೆದುಕೊಂಡಿದ್ದಾರೆ. ತನ್ನ ದೀರ್ಘಕಾಲದ ಗೆಳತಿ ಶಾಲಿನಿ ನಾರಾಯಣ್ ಅವರನ್ನು 2020ರಲ್ಲಿ ವರಿಸಿದ್ದರು ಚಂದು ಬಿ ಗೌಡ. ನಾಲ್ಕು ವರ್ಷಗಳ ಡೇಟಿಂಗ್ ನಂತರ ಮನೆಯವರ ಸಮ್ಮತಿಯಂತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ತಮ್ಮ ಕುಟುಂಬಕ್ಕೆ ಮುದ್ದು ಕಂದ ಬರಲಿರುವ ಈ ವಿಷಯವನ್ನು ಸಾಮಾಜಿಕ ಜಾಲತಾಣದಲ್ಲಿ ಚಂದು ಗೌಡ ಶೇರ್ ಮಾಡುತ್ತಿದ್ದಂತೆ ಸ್ನೇಹಿತರು, ಫ್ಯಾನ್ಸ್ ಶುಭಾಶಯಗಳನ್ನು ಕೋರಿದ್ದಾರೆ.

ಸ್ಯಾಂಡಲ್ ವುಡ್ ಕ್ವೀನ್ ರಮ್ಯಾ ಚಿತ್ರರಂಗದಿಂದ ದೂರವಾಗಿ ಕೆಲವು ವರ್ಷಗಳೇ ಕಳೆದಿವೆ. ಸಿನಿಮಾ ನಟನೆಯಿಂದ ದೂರ ಉಳಿದಿರುವ ರಮ್ಯಾ ಅವರನ್ನು ಮತ್ತೆ ತೆರೆ ಮೇಲೆ ನೋಡಲು ಅಭಿಮಾನಿಗಳು ಕಾಯುತ್ತಿದ್ದಾರೆ. ರಮ್ಯಾ ಸಿನಿ ಕೆರಿಯರ್ ಆರಂಭಿಸಿ ಎಪ್ರಿಲ್ 25ಕ್ಕೆ 19 ವರ್ಷಗಳು ಕಳೆದಿವೆ. ಪುನೀತ್ ರಾಜ್ ಕುಮಾರ್ ನಟನೆಯ ಅಭಿ ಸಿನಿಮಾ ಮೂಲಕ ಚಂದನವನಕ್ಕೆ ಕಾಲಿಟ್ಟ ರಮ್ಯಾ ಮುಂದೆ ಸ್ಟಾರ್ ನಟಿಯಾಗಿ ಬೆಳೆದರು. ನಟಿಸಿದ ಮೊದಲ ಸಿನಿಮಾ ಅಭಿ ಹಿಟ್ ಆಗಿತ್ತು. ಹೀಗಾಗಿ ಚಂದನವನದಲ್ಲಿ ಅವರಿಗೆ ಬೇಡಿಕೆ ಹೆಚ್ಚಾಯಿತು. ಸಾಲು ಸಾಲು ಚಿತ್ರಗಳಲ್ಲಿ ನಟಿಸಿದರು. ಬಹು ಬೇಡಿಕೆಯ ನಟಿಯಾಗಿ ಬೆಳೆದ ರಮ್ಯಾ ಅವರಿಗೆ ಪರಭಾಷೆಗಳಿಂದಲೂ ಆಫರ್ಸ್ ಬರತೊಡಗಿದವು. ಇಂತಿಪ್ಪ ರಮ್ಯಾ ಪ್ರೈಮರಿ ಶಿಕ್ಷಣ ಊಟಿಯಲ್ಲಿ ಹಾಗೂ ಪ್ರೌಢ ಶಿಕ್ಷಣ ಚೆನ್ನೈಯಲ್ಲಿ ಮುಗಿಸಿದರು. ಅಪ್ಪು ಸಿನಿಮಾ ಮೂಲಕ ಲಾಂಚ್ ಆಗಬೇಕಿದ್ದ ರಮ್ಯಾ ಕಾರಣಾಂತರಗಳಿಂದ ಅಭಿ ಸಿನಿಮಾ ಮೂಲಕ ಕೆರಿಯರ್ ಆರಂಭಿಸಿದರು. ಅಪ್ಪು ಸಿನಿಮಾದಲ್ಲಿ ರಕ್ಷಿತಾ ನಟಿಸಿದರು. ಅಭಿ ಸಿನಿಮಾದ ನಂತರ ಜೋಗಿ ಪ್ರೇಮ್ ನಿರ್ದೇಶನದ ಎಕ್ಸ್ ಕ್ಯೂಸ್ ಮಿ ಚಿತ್ರದಲ್ಲಿ ನಟಿಸಿದರು. ನಂತರ ತೆಲುಗು ಚಿತ್ರರಂಗ ಪ್ರವೇಶಿಸಿದ ರಮ್ಯಾ ಅಲ್ಲಿಯೂ ಯಶಸ್ಸು ಗಳಿಸಿದರು. ಹಲವು ಸೂಪರ್ ಹಿಟ್ ಚಿತ್ರಗಳನ್ನು ನೀಡಿರುವ ಸ್ಯಾಂಡಲ್ ವುಡ್ ಪದ್ಮಾವತಿ ನಂತರ ರಾಜಕೀಯ ಪ್ರವೇಶಿಸಿದರು. ಮಂಡ್ಯದಲ್ಲಿ ಸಂಸದೆ ಆಗಿ ಕೆಲಸ ಮಾಡಿದರು. ಸದ್ಯ ಹಲವು ಕಥೆಗಳನ್ನು ಕೇಳುತ್ತಿರುವ ರಮ್ಯಾ ಮತ್ತೆ ಸಿನಿಮಾ ಮಾಡುವುದಾಗಿ ಹೇಳಿದ್ದಾರೆ. ಈ ವಿಷಯ ಅಭಿಮಾನಿಗಳಿಗೆ ಖುಷಿ ನೀಡಿದೆ.