ದೇಶ

ದಕ್ಷಿಣ ಭಾರತದ ಖ್ಯಾತ ನಟಿಯರಲ್ಲಿ ಒಬ್ಬರಾದ ಮೀನಾ ಈಗ ಯುನೈಟೆಡ್ ಅರಬ್ ಎಮಿರೇಟ್ಸ್ ನಿಂದ ಗೋಲ್ಡನ್ ವೀಸಾ ಪಡೆದುಕೊಂಡಿದ್ದಾರೆ. ಸ್ವತಃ ಮೀನಾ ಈ ಸುದ್ದಿಯನ್ನು ಹಂಚಿಕೊಂಡಿದ್ದಾರೆ. ತನಗೆ ಗೋಲ್ಡನ್ ವೀಸಾ ನೀಡಿದ್ದಕ್ಕೆ ಯುಎಇ ಸರ್ಕಾರಕ್ಕೆ ಧನ್ಯವಾದ ಹೇಳಿರುವ ಮೀನಾ ವೀಸಾ ತೆಗೆದುಕೊಳ್ಳುತ್ತಿರುವ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಗೋಲ್ಡನ್ ವೀಸಾ ಪಡೆದವರಲ್ಲಿ ಮೀನಾ ಮೊದಲಿಗರೇನಲ್ಲ. ಭಾರತದಲ್ಲಿ ಈಗಾಗಲೇ ಹಲವು ನಟನಟಿಯರಿಗೆ ಈ ಗೋಲ್ಡನ್ ವೀಸಾ ದೊರೆತಿದೆ. ಮಲೆಯಾಳಂ ಚಿತ್ರರಂಗದ ಮೋಹನ್ ಲಾಲ್, ಮಮ್ಮುಟ್ಟಿ ,ಅಮಲಾ ಪೌಲ್, ನಿವಿನ್ ಪೌಲಿ ಸೇರಿದಂತೆ ಬಾಲಿವುಡ್, ಕಾಲಿವುಡ್, ಸ್ಯಾಂಡಲ್ ವುಡ್ ನ ಅನೇಕ ನಟನಟಿಯರಿಗೆ ಸಿಕ್ಕಿದೆ. ಬಾಲಕಲಾವಿದೆಯಾಗಿ 1982ರಲ್ಲಿ ನೆಂಜಂಗಲ್ ಚಿತ್ರದಲ್ಲಿ ನಟಿಸುವ ಮೂಲಕ ನಟನಾ ಜಗತ್ತಿಗೆ ಕಾಲಿಟ್ಟರು. ನಂತರ ನಾಯಕಿಯಾಗಿ ತಮಿಳು, ತೆಲುಗು ಮಲಯಾಳಂ ಸಿನಿಮಾ ರಂಗದಲ್ಲಿ ನಟನಾ ಕಂಪನ್ನು ಪಸರಿಸಿದ್ದ ಮೀನಾ ಪುಟ್ನಂಜನ ರೋಸ್ ಆಗಿ ಚಂದನವನಕ್ಕೆ ಪಾದಾರ್ಪಣೆ ಮಾಡಿದರು. ಮುಂದೆ ಮೊಮ್ಮಗ, ಚೆಲುವ, ಸಿಂಹಾದ್ರಿಯ ಸಿಂಹ, ಸ್ವಾತಿಮುತ್ತು, ಗೇಮ್ ಫಾರ್ ಲವ್, ಗೌಡ್ರು, ಮಹಾಸಾಧ್ವಿ ಮಲ್ಲಮ್ಮ, ಮೈ ಆಟೋಗ್ರಾಫ್, ಹೆಂಡ್ತೀರ್ ದರ್ಬಾರ್ ಸಿನಿಮಾಗಳಲ್ಲಿ ನಟಿಸಿದರು. ಹಿರಿತೆರೆಯ ಜೊತಗೆ ಕಿರುತೆರೆಯಲ್ಲಿಯೂ ತೀರ್ಪುಗಾರ್ತಿಯಾಗಿ ಕಮಾಲ್ ಮಾಡಿರುವ ಮೀನಾ ವಿದ್ಯಾಸಾಗರ್ ಅವರೊಡನೆ ದಾಂಪತ್ಯ ಜೀವನಕ್ಕೆ ಕಾಲಿರಿಸಿದರು. ಇನ್ನು ಮೀನಾ ವಿದ್ಯಾಸಾಗರ್ ದಂಪತಿಗಳಿಗೆ ನೈನಿಕಾ ಎನ್ನುವ ಮಗಳಿದ್ದು ಆಕೆಯೂ ಬಾಲನಟಿಯಾಗಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸದ್ಯ ಮೀನಾ ಅವರು ನಟಿಸಿರುವ ಮಲೆಯಾಳಂ ನ “ಬ್ರೋ ಡ್ಯಾಡಿ” ಚಿತ್ರ ಹಿಟ್ ಆಗಿದೆ.

ಲವ್ಲಿ ಸ್ಟಾರ್ ಪ್ರೇಮ್ ನಟನೆಯ ಪ್ರೇಮಂ ಪೂಜ್ಯಂ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿ ಸೈ ಎನಿಸಿಕೊಂಡಿರುವ ಬೃಂದಾ ಆಚಾರ್ಯ ಇದೀಗ ಮಹಿಳಾ ಪ್ರಧಾನ ಸಿನಿಮಾದಲ್ಲಿ ಬಣ್ಣ ಹಚ್ಚಲಿದ್ದಾರೆ. ಜ್ಯೂಲಿಯಟ್ 2 ಎನ್ನುವ ಮಹಿಳಾ ಪ್ರಧಾನ ಸಿನಿಮಾದಲ್ಲಿ ನಟಿಸಲು ಬೃಂದಾ ಆಚಾರ್ಯ ಗ್ರೀನ್ ಸಿಗ್ನಲ್ ನೀಡಿದ್ದು ಇದು ದ್ವಿಭಾಷೆಯಲ್ಲಿ ಸಿದ್ಧಗೊಳ್ಳಲಿರುವುದು ವಿಶೇಷ. ಕನ್ನಡದ ಜೊತೆಗೆ ಮಲಯಾಳಂ ಭಾಷೆಯಲ್ಲಿಯೂ ಈ ಸಿನಿಮಾ ಬರಲಿದ್ದು ಆ ಮೂಲಕ ಪರಭಾಷೆಯ ಸಿನಿಮಾ ಕ್ಷೇತ್ರದಲ್ಲೂ ಬೃಂದಾ ಆಚಾರ್ಯ ಶೈನ್ ಆಗಲಿದ್ದಾರೆ. ಪ್ರೇಮಂ ಪೂಜ್ಯಂ ನಂತರ ಮಗದೊಂದು ಸಿನಿಮಾದಲ್ಲಿ ನಟಿಸುವ ಅವಕಾಶ ಪಡೆದುಕೊಂಡಿರುವ ಬೃಂದಾ ಆಚಾರ್ಯಗೆ ಬಾಲ್ಯದಿಂದಲೂ ಇದ್ದುದು ಒಂದೇ ಕನಸು. ಅದು ನಟಿಯಾಗಬೇಕು ಎಂಬುದು! ಇಂಜಿನಿಯರಿಂಗ್ ಪದವೀಧರೆಯಾಗಿರುವ ಬೃಂದಾ ಓದು ಮುಗಿದದ್ದೇ ಕಂಪೆನಿಯೊಂದರಲ್ಲಿ ಕೆಲಸವನ್ನು ಗಿಟ್ಟಿಸಿಕೊಂಡ ಗಟ್ಟಿಗಿತ್ತಿ. ಆದರೆ ನಟನೆಯ ಮೇಲಿನ ವ್ಯಾಮೋಹ ಅದ್ಯಾವಾಗ ಜಾಸ್ತಿಯಾಯಿತೋ, ಆಗ ಕೆಲಸ ಬಿಡುವ ನಿರ್ಧಾರ ಮಾಡಿದರು. ಮೊದಲ ಆಡಿಶನ್ ಗೆ ಹೋದ ಬೃಂದಾ ಆಯ್ಕೆಯಾಗಿದ್ದರು. ಹೌದು, ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಪೌರಾಣಿಕ ಧಾರಾವಾಹಿ ಮಹಾಕಾಳಿ ಯ ಆಡಿಶನ್ ಗೆ ಹೋದ ಬೃಂದಾ ಆಚಾರ್ಯ ರತಿಯ ಪಾತ್ರಕ್ಕೆ ಆಯ್ಕೆಯೂ ಆದರು. ಮಹಾಕಾಳಿ ಧಾರಾವಾಹಿಯ ನಂತರ ಮತ್ತೆ ನಟಿಸಿದ್ದು ಕೂಡಾ ಪೌರಾಣಿಕ ಧಾರಾವಾಹಿಯಲ್ಲಿ ಎಂಬುದು ವಿಶೇಷ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಶನಿ ಧಾರಾವಾಹಿಯಲ್ಲಿ ಶನಿಯ ಪತ್ನಿ ದಾಮಿನಿ ಪಾತ್ರಕ್ಕೆ ಜೀವ ತುಂಬಿದ್ದ ಬೃಂದಾ ಆಚಾರ್ಯ ನಂತರದ ದಿನಗಳಲ್ಲಿ ಆರಿಸಿಕೊಂಡಿದ್ದು ಹಿರಿತೆರೆಯನ್ನು. ಪ್ರೇಮಂ ಪೂಜ್ಯಂ ಸಿನಿಮಾದ ನಾಯಕಿಯಾಗಿ ನಟಿಸಿದ್ದ ಬೃಂದಾ ಸಿನಿಪ್ರಿಯರ ಮನದಲ್ಲಿ ಸ್ಥಾನ ಪಡೆದರು. ಇದೀಗ ದ್ವಿಭಾಷೆಯ ಸಿನಿಮಾದಲ್ಲಿ ಅಭಿನಯಿಸುತ್ತಿರುವ ಈಕೆಯ ಬಣ್ಣದ ಜರ್ನಿ ಕಲರ್ ಫುಲ್ ಆಗಿ ಸಾಗಲಿ ಎಂಬುದೇ ನಮ್ಮ ಹಾರೈಕೆ.

ಕೆಜಿಎಫ್, ಹೆಸರು ಕೇಳಿದರೆ ಚಿನ್ನದ ನೆನಪು ಬರುತ್ತಿದ್ದ ಜನರಿಗೆ ಈಗ ರಾಕಿಂಗ್ ಸ್ಟಾರ್ ಯಶ್, ಪ್ರಶಾಂತ್ ನೀಲ್ ಮುಂತಾದವರ ನೆನಪಾಗುತ್ತದೆ. ಅದು ಆ ಸಿನಿಮಾ ಹುಟ್ಟುಹಾಕಿದ ಭರವಸೆಗೆ ಸಾಕ್ಷಿ. ಈಗ ಈ ಚಿತ್ರದ ಎರಡನೇ ಭಾಗದ ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ. ಇದರ ಬೆನ್ನಲ್ಲೇ ಕೆಜಿಎಫ್ ಚಾಪ್ಟರ್ 2 ಬಗೆಗಿನ ವಿವಿಧ ಹೊಸ ರೋಮಾಂಚನಕಾರಿ ವಿಷಯಗಳು ಹೊರಬೀಳುತ್ತಿವೆ. ನಮಗೆಲ್ಲ ಗೊತ್ತಿರೋ ಹಾಗೆಯೇ ಕೆಜಿಎಫ್ ಒಂದು ಪಾನ್-ಇಂಡಿಯನ್ ಚಿತ್ರ, ಮಾತ್ರವಲ್ಲದೆ ಪ್ರಪಂಚದ ಪ್ರಾಕೃತಿಕ ಮೂಲೆಗಳಿಂದ, ಭಾಷಾ-ಭೇಧ ಇಲ್ಲದೆ ಎಣಿಸಲಾಗದಷ್ಟು ಸಿನಿಪ್ರೇಮಿಗಳು ಕಾತುರದಿಂದ ಕಾಯುತ್ತಿರೋ ಸಿನಿಮಾ. ಇನ್ನೇನು ಸುಮಾರು ಒಂದು ತಿಂಗಳು, ಅಂದರೆ ಏಪ್ರಿಲ್ 14ರಂದು ಪ್ರಪಂಚಾದಾದ್ಯಂತ ಬೆಳ್ಳಿತೆರೆಯನ್ನ ಬೆಳಗಲಿದೆ. ಈಗಾಗಲೇ ಚಿತ್ರತಂಡ ಚಿತ್ರದ ಟ್ರೈಲರ್ ಬಿಡುಗಡೆ ದಿನಾಂಕವನ್ನ ಹೊರಹಾಕಿದೆ. ಮಾರ್ಚ್ 27ರ ಸಾಯಂಕಾಲ 6:40ರ ಸುಮಾರಿಗೆ ಟ್ರೈಲರ್ ಯೂಟ್ಯೂಬ್ ನಲ್ಲಿ ಬೆಂಕಿ ಹತ್ತಿಸಲಿದೆ. ಸದ್ಯ ಚಿತ್ರದ ಹಂಚಿಕೆ ಹಕ್ಕುಗಳಿಗಾಗಿ ಭರದಿಂದ ಬೇಡಿಕೆಗಳೇರುತ್ತಿವೆ. ನಮ್ಮ ಕರುನಾಡಿನಲ್ಲಿ ಕನ್ನಡದ ಕೆಜಿಎಫ್ ಹಂಚಿಕೆ ಹೊಂಬಾಳೆ ಸಂಸ್ಥೆಯದ್ದು. ತೆಲುಗಿನಲ್ಲಿ ‘ಶ್ರೀ ವೆಂಕಟೇಶ್ ಕ್ರಿಯೇಷನ್ಸ್’, ತಮಿಳಿನಲ್ಲಿ ‘ಡ್ರೀಮ್ ವಾರಿಯರ್ ಪಿಕ್ಚರ್ಸ್’ ಜವಾಬ್ದಾರಿಯಾದರೆ, ಮಲಯಾಳಂನಲ್ಲಿ ‘ಪೃಥ್ವಿರಾಜ್ ಪ್ರೊಡಕ್ಷನ್ಸ್’ ಜನರಿಗೆ ತಲುಪಿಸಲಿದೆ. ಇನ್ನು ಭಾರತದ ಶ್ರೀಮಂತ ಸಿನಿಪ್ರಪಂಚ ಬಾಲಿವುಡ್ ನಲ್ಲಿ ‘ಎಕ್ಸಲ್ ಎಂಟರ್ಟೈನ್ಮೆಂಟ್’ ಹಾಗು ‘AA ಫಿಲಂಸ್’ ಕೆಜಿಎಫ್ ನ ಚಿನ್ನವನ್ನು ಜನರಿಗೆ ಹಂಚಲಿದೆ. ಪರದೇಶಗಳಲ್ಲಿನ ಹಿಂದಿ ಹಂಚಿಕೆಯನ್ನ ಅನಿಲ್ ತಧಾನಿ ತಮ್ಮದಾಗಿಸಿಕೊಂಡಿದ್ದಾರೆ ಎಂಬ ಸುದ್ದಿ ಇದೆ. ಇನ್ನು ಕೆಜಿಎಫ್ ಹೊರದೇಶಗಳಲ್ಲಿ ಬೇರೆ ಬೇರೆ ಭಾಷೆಗಳಲ್ಲಿ ಬಿಡುಗಡೆಯಾಗಲಿದ್ದು ಈ ಎಲ್ಲ ಹಕ್ಕುಗಳಿಗೆ ಮೂಲಸಂಸ್ಥೆಯಾದ ಹೊಂಬಾಳೆಯವರು ಬೃಹತ್ ಮೊತ್ತವನ್ನ ಕೇಳುತ್ತಿದ್ದಾರೆಬುದು ಬಜಾರಿನ ಮಾತು. ಹಂಚಿಕೆದಾರರು ಯಾರೆಂದು ಇನ್ನು ತಿಳಿಯದಾದರೂ ಸಹ ಕೆಜಿಎಫ್ ಚಾಪ್ಟರ್ 2ರ ಬೇಡಿಕೆ ಮಾತ್ರ ಮುಗಿಲಿನೆತ್ತರದಲ್ಲಿದೆ.

ಮಿಸ್ಟರ್ ಅಂಡ್ ಮಿಸಸ್ ರಾಮಾಚಾರಿ, ಮೂಕಜ್ಜಿಯ ಕನಸು, ತಮಿಳಿನ ತಾರೈ ತಪ್ಪಟ್ಟೈ ಸೇರಿದಂತೆ ಸಾಕಷ್ಟು ಸಿನಿಮಾಗಳಲ್ಲಿ ನಟಿಸಿರುವ ಕಾವ್ಯ ಶಾ ಸಪ್ತಪದಿ ತುಳಿಯಲು ಸಿದ್ದರಾಗಿದ್ದಾರೆ.. ತಮ್ಮ ಬಹುಕಾಲದ ಗೆಳೆಯನ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಡಲು ಸಿದ್ಧರಾಗಿರುವಂತೆ ಕಾವ್ಯ ಶಾ ಈಗಾಗಲೇ ಮದುವೆಗೆ ಬೇಕಾದ ಎಲ್ಲ ರೀತಿಯ ತಯಾರಿ ಮಾಡಿಕೊಂಡಿದ್ದಾರೆ… ಏಪ್ರಿಲ್ ಎರಡನೇ ವಾರದಲ್ಲಿ ಕಾವ್ಯ ಮದುವೆ ಜರುಗಲಿದ್ದು ಕಾವ್ಯ ಮದುವೆ ಆಗುತ್ತಿರುವ ಹುಡುಗನ ಹೆಸರು ವರುಣ್ . ವರುಣ್ ಮಾಧ್ಯಮ ಲೋಕದಲ್ಲಿ ಗುರುತಿಸಿಕೊಂಡಿದ್ದು ಈಗಾಗಲೇ ಸಾಕಷ್ಟು ಎಂಟರ್ ಟೈನ್ಮೆಂಟ್ ಚಾನೆಲ್ ಗಳಲ್ಲಿ ರಿಯಾಲಿಟಿ ಷೋಗಳನ್ನು ಆಯೋಜನೆ ಮಾಡುವ ಮೂಲಕ ಸಿನಿಮಾ ಗಣ್ಯರಿಗೆ ಪರಿಚಿತರಾಗಿದ್ದಾರೆ ..ಹತ್ತು ವರ್ಷಗಳಿಂದ ಸ್ನೇಹಿತರಾಗಿದ್ದ ಇವರಿಬ್ಬರು ಈಗ ಮನೆಯವರ ಆಶೀರ್ವಾದ ಪಡೆದು ಮದುವೆ ಆಗಲು ಸಿದ್ಧತೆ ಮಾಡಿಕೊಂಡಿದ್ದಾರೆ… ಇನ್ನೂ ಕಾವ್ಯಾ ಶಾ ಸ್ಯಾಂಡಲ್ ವುಡ್ ಸೇರಿದಂತೆ ಟಾಲಿವುಡ್ ಹಾಗೂ ಬಾಲಿವುಡ್ ಅಂಗಳದ ಸಿನಿ ಗಣ್ಯರಿಗೆ ಚಿರಪರಿಚಿತರಾಗಿದ್ದರಿಂದ ಕಾವ್ಯ ಶಾ ಮದುವೆಗೆ ಸ್ಯಾಂಡಲ್ ವುಡ್ , ಬಾಲಿವುಡ್, ಕಾಲಿವುಡ್ ಹಾಗೂ ಟಾಲಿವುಡ್ ನ ಸ್ಟಾರ್ ಗಳು ಬರುವ ಸಾಧ್ಯತೆಯಿದೆ ಕಾವ್ಯ ಶಾ ಫಿಟ್ ನೆಸ್ ಬಗ್ಗೆ ತಮ್ಮದೇ ಆದ ಸ್ಟುಡಿಯೋ ಹೊಂದಿದ್ದಾರೆ. ಈ ಮೂಲಕ ಫಿಟ್ನೆಸ್ ಮಂತ್ರವನ್ನೂ ಅವರು ಅಭಿಮಾನಿಗಳ ಜತೆ ಸದಾ ಹಂಚಿಕೊಳ್ಳುತ್ತಲೇ ಇರುತ್ತಾರೆ.

ಪ್ಯಾನ್ ಇಂಡಿಯಾ ಸಿನಿಮಾ ಪುಷ್ಪ ಬಿಡುಗಡೆಯಾಗಿ ಮೂರು ತಿಂಗಳುಗಳು ಕಳೆದಿದೆ. ಪುಷ್ಟ ಸಿನಿಮಾದ ನೋಟ ಬಂಗಾರವಾಯಿತೇ ಶ್ರೀವಲ್ಲಿ ಮಾತೇ ಮಾಣಿಕ್ಯವಾಯಿತೇ ಹಾಡು ಕನ್ನಡ ಸಿನಿರಂಗದಲ್ಲಿ ಉಂಟು ಮಾಡಿದ ಕ್ರೇಜ್ ಅಷ್ಟಿಷ್ಟಲ್ಲ. ಸಿನಿಮಾ ರಿಲೀಸ್ ಆಗಿ ಬರೋಬ್ಬರಿ ಮೂರು ತಿಂಗಳುಗಳು ಕಳೆದಿದ್ದರೂ ಇನ್ನು ಕೂಡಾ ಅಬೇಕರು ಅದೇ ಹಾಡನ್ನು ಗುನುಗುನಿಸುತ್ತಾ ಇದ್ದಾರೆ. ದಿನಕ್ಕೆ ಒಮ್ಮೆಯಾದರೂ ಆ ಹಾಡು ಕಿವಿಗೆ ಬೀಳುವುದಂತೂ ಪಕ್ಕಾ! ಇನ್ನು ರೀಲ್ಸ್ ನಲ್ಲಿಯೂ ಈ ಹಾಡಿನ ಟ್ರೆಂಡ್ ಇನ್ನೂ ಸಾಗುತ್ತಿದೆ. ಕನ್ನಡದ ಜೊತೆಗೆ ತಮಿಳು, ತೆಲುಗು, ಹಿಂದಿ ಹಾಗೂ ಮಲಯಾಳಂ ಹೀಗೆ ದಕ್ಷಿಣ ಭಾರತ ಎಲ್ಲಾ ಭಾಷೆಗಳಲ್ಲೂ ಬಂದ ಈ ಹಾಡನ್ನು ಸಿದ್ ಶ್ರೀರಾಮ್ ಹಾಡಿದ್ದು, ಹಿಂದಿಯಲ್ಲಿ ಜಾವೇದ್ ಅಲಿ ಹಾಡಿದ್ದಾರೆ. ಇಂತಿಪ್ಪ ಶ್ರೀವಲ್ಲಿ ಹಾಡು ಹಾಡು ಬೆಂಗಾಲಿ ಭಾಷೆಯಲ್ಲಿ ಬಂದಿದೆ. ಖ್ಯಾತ ಗಾಯಕಿ ಉಷಾ ಉತ್ತುಪ್ ಬೆಂಗಾಲಿ ಭಾಷೆಯಲ್ಲಿ ಹಾಡಿದ್ದಾರೆ. ಉಷಾ ಅವರ ಧ್ವನಿಯಲ್ಲಿ ಈ ಹಾಡು ಕೇಳಿ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಬೆಂಗಾಲಿ ಭಾಷೆಯ ಸಾಹಿತ್ಯವನ್ನು ರಾಜೀವ್ ದುತ್ತಾ ಸಾಹಿತ್ಯ ಬರೆದಿದ್ದು ಈಗಾಗಲೇ ಈ ವಿಡಿಯೋ ವೈರಲ್ ಆಗಿದ್ದು 4 ಲಕ್ಷಕ್ಕೂ ಅಧಿಕ ವೀಕ್ಷಣೆ ಪಡೆದುಕೊಂಡಿದೆ.

ಕನ್ನಡ ಕಿರುತೆರೆಯಲ್ಲಿ ಮೊದಲ ಬಾರಿಗೆ ಧಾರಾವಾಹಿಯೊಂದು ತನ್ನ ವ್ಯಾಪ್ತಿಯನ್ನು ವಿಸ್ತರಿಸಿಕೊಂಡಿದೆ. ಮದುವೆ ಶೂಟಿಂಗ್ ಅನ್ನು ಗೋವಾದಲ್ಲಿ ಮಾಡಿದೆ. ಹೌದು ಲಕ್ಷಣ ಧಾರಾವಾಹಿ ಭೂಪತಿಯ ಮದುವೆ ವಿಶೇಷ ಎಪಿಸೋಡ್ ಬರಲಿದ್ದು ಗೋವಾದಲ್ಲಿ ಮದುವೆ ಚಿತ್ರೀಕರಣ ಪೂರ್ಣಗೊಂಡಿದೆ. ಗೋವಾದಲ್ಲಿ 4 ದಿನಗಳ ಚಿತ್ರೀಕರಣ ಮಾಡಿರುವ ತಿಂಡಿ ಈಗ ಬೆಂಗಳೂರಿನಲ್ಲಿ ಉಳಿದ ಶೆಡ್ಯೂಲ್ ಶೂಟಿಂಗ್ ಪೂರ್ಣಗೊಳಿಸುತ್ತಿದೆ. ಇದರ ಬಗ್ಗೆ ಮಾತನಾಡಿರುವ ಲಕ್ಷಣ ಧಾರಾವಾಹಿಯ ನಾಯಕ, ನಿರ್ಮಾಪಕ ಹಾಗೂ ಕ್ರಿಯೇಟಿವ್ ನಿರ್ದೇಶಕ ಜಗನ್ “ಡೆಸ್ಟಿನೇಷನ್ ವೆಡ್ಡಿಂಗ್ ನ ಶೂಟಿಂಗ್ ಮಾಡುವುದು ಸುಲಭದ ಕಾರ್ಯವಲ್ಲ. ಕಲಾವಿದರಿಂದ ಹಿಡಿದು ತಾಂತ್ರಿಕ ವರ್ಗದವರು, ಪ್ರತಿಯೊಬ್ಬರೂ ಚುರುಕಾಗಿ ಇರಬೇಕು. ಮದುವೆ ಈ ಕಥೆಯಲ್ಲಿ ಪ್ರಮುಖ ತಿರುವು ತರುತ್ತದೆ. ಪ್ರೇಕ್ಷಕರು ಭೂಪತಿ ನಕ್ಷತ್ರಾ ಅಥವಾ ಶ್ವೇತಾಳನ್ನು ಮದುವೆಯಾಗುತ್ತಾನೆಯೇ ಎಂದು ತಿಳಿಯಲು ಕಾತುರರಾಗಿದ್ದಾರೆ. ಹೀಗಾಗಿ ಇದು ವಿಶೇಷವಾದುದು”ಎಂದಿದ್ದಾರೆ. “ರಾಧಾ ರಮಣ, ಅಗ್ನಿಸಾಕ್ಷಿ , ಲಕ್ಷ್ಮಿ ಬಾರಮ್ಮ ಧಾರಾವಾಹಿಗಳನ್ನು ನೋಡುವುದಾದರೆ ಅವರೆಲ್ಲರೂ ಮದುವೆಯಾಗಿ ಪಯಣ ಆರಂಭಿಸಿದರು. ಆದರೆ ಲಕ್ಷಣವನ್ನು ಹೋಲಿಕೆ ಮಾಡಿದರೆ ಇದು ಸಂಪೂರ್ಣ ವಿಭಿನ್ನವಾದ ಕಥೆಯಾಗಿದೆ. ಗೆಳೆತನ, ಪ್ರಪೋಸಲ್ ಹಾಗು ಎಲ್ಲವೂ ಹೀರೋ ಮದುವೆಯಾದಾಗ ಕಥೆ ಒಂದು ಹಂತಕ್ಕೆ ಬಂದು ತಲುಪುತ್ತದೆ. ನಿಜವಾದ ಕಥೆ ಇಲ್ಲಿಂದಲೇ ಆರಂಭವಾಗುತ್ತದೆ. ನಾನು ಕಥೆಯ ಮೊದಲ ದಿನದಿಂದಲೇ ಭಾಗವಾಗಿರುವುದರಿಂದ ಮದುವೆ ಸೀಕ್ವೆನ್ಸ್ ನಲ್ಲಿ ಏನಾದರೂ ಕುತೂಹಲಕಾರಿಯಾಗಿರುವುದನ್ನು ತಲುಪಿಸಬೇಕೆಂದು ಕಾತರನಾಗಿದ್ದೆ. ಸಾಮಾನ್ಯವಾಗಿ ಮಾಡುವ ಹಾಲ್ ಅಥವಾ ರೆಸಾರ್ಟ್ ನಲ್ಲಿ ಚಿತ್ರೀಕರಣ ಮಾಡುವುದು ನನಗೆ ಓಕೆ ಆಗಿರಲಿಲ್ಲ. ಹೊಸತನ್ನು ಮಾಡಬೇಕೆಂದು ಬಯಸಿದೆ” ಎಂದಿದ್ದಾರೆ. ಡೆಸ್ಟಿನೇಷನ್ ವೆಡ್ಡಿಂಗ್ ಎಂಬ ವಿಚಾರ ಬಂದಾಗ ಬೇರೇನೂ ಯೋಚಿಸದ ಜಗನ್ ” ಡೆಸ್ಟಿನೇಷನ್ ವೆಡ್ಡಿಂಗ್ ಬಗ್ಗೆ ಮಾತನಾಡುವಾಗ ನನಗೆ ಮೊದಲಿಗೆ ಹೊಳೆದ ಜಾಗ ಗೋವಾ. ಕನ್ನಡ ಕಿರುತೆರೆಯಲ್ಲಿ ಯಾರೂ ಡೆಸ್ಟಿನೇಷನ್ ವೆಡ್ಡಿಂಗ್ ಸೀಕ್ವೆನ್ಸ್ ಮಾಡಿಲ್ಲ. ಗೋವಾದಲ್ಲಿ ಅಂತೂ ಮಾಡಿಲ್ಲ. ನಾವು ಬೇಗನೆ ಡೆಸ್ಟಿನೇಷನ್ ವೆಡ್ಡಿಂಗ್ ದೃಶ್ಯಗಳ ಮೇಲೆ ಕೆಲಸ ಮಾಡಿದೆವು. ತಂಡದೊಂದಿಗೆ ಗೋವಾಕ್ಕೆ ತೆರಳಿದೆವು. ಗೋವಾದಲ್ಲಿ ಗಾಲ್ಫ್ ಕೋರ್ಸ್ ನಲ್ಲಿ ಶೂಟಿಂಗ್ ಮಾಡಿದ್ದೇವೆ. ಬೀಚ್ ಏರಿಯಾ , ರೆಸಾರ್ಟ್ ಸೇರಿದಂತೆ ಹಲವು ಬೇರೆ ಬೇರೆ ಸ್ಥಳಗಳಲ್ಲಿ ಶೂಟಿಂಗ್ ಮಾಡಿದ್ದೇವೆ. ಪ್ರತಿಯೊಬ್ಬರೂ ಸಂಪೂರ್ಣ ಶ್ರಮ ಹಾಕಿದ್ದಾರೆ. ಗೋವಾ ಯಾವ ಸ್ಥಳಕ್ಕೂ ಕಡಿಮೆ ಇಲ್ಲ. ಇದು ಡೆಸ್ಟಿನೇಷನ್ ವೆಡ್ಡಿಂಗ್ ಗೆ ಉತ್ತಮ ಸ್ಥಳವಾಗಿದೆ. ಇತ್ತೀಚೆಗೆ ಗೋವಾದಲ್ಲಿ ಹಲವು ಮದುವೆಗಳು ನಡೆಯುತ್ತಿವೆ. “ಎಂದಿದ್ದಾರೆ. “ಲಕ್ಷಣ ಧಾರಾವಾಹಿ ವೀಕ್ಷಕರ ನಿರೀಕ್ಷೆಯನ್ನು ಈಡೇರಿಸುತ್ತದೆ. ನಾವು ಅತ್ಯುತ್ತಮವಾದುದನ್ನು ನೀಡಲು ನಮ್ಮ ಪ್ರಯತ್ನ ಮಾಡುತ್ತೇವೆ. ವೆಡ್ಡಿಂಗ್ ಸೀಕ್ವೆನ್ಸ್ ನನ್ನು ವೀಕ್ಷಕರು ಇಷ್ಟಪಡುತ್ತಾರೆ ಎಂದು ನಂಬಿದ್ದೇನೆ”ಎಂದಿದ್ದಾರೆ ಜಗನ್.

ತೆಲುಗುವಿನಲ್ಲಿ ಮೋಡಿ ಮಾಡುತ್ತಿರೋ ಕನ್ನಡ ನಟಿಮಣಿಯರು ಹಲವರು. ಈ ಸಾಲಿಗೆ ಹೊಸ ಸೇರ್ಪಡೆಗಳು ಆಗುತ್ತಲೇ ಇರುತ್ತವೆ. ಸದ್ಯ ಟೋಲಿವುಡ್ ಪ್ರೇಕ್ಷಕರ ಕಣ್ಮನ ಸೆಳೆಯುತ್ತಿರೋ ನಟಿ ಮಂಗಳೂರಿನ ಕುವರಿ ನೇಹಾ ಶೆಟ್ಟಿ. ಗೋಲ್ಡನ್ ಸ್ಟಾರ್ ಗಣೇಶ್ ನಟನೆಯ ಮುಂಗಾರುಮಳೆ 2 ಚಿತ್ರದಿಂದ ಬೆಳ್ಳಿತೆರೆಗೆ ಪಾದಾರ್ಪಣೆ ಮಾಡಿದ್ದ ನೇಹಾ ಶೆಟ್ಟಿ ಹಲವಾರು ಪಡ್ಡೆ ಹುಡುಗರ ಕಣ್ಣಿಗೆ ಮಿಂಚಂತೆ ಸೆಳೆದಿದ್ದರು. ನಂತರ ನಟಿ ಕಂಡುಬಂದಿದ್ದು ತೆಲುಗಿನ ಮೆಹಬೂಬ ಚಿತ್ರದಲ್ಲಿ. ಆಮೇಲೆ ಕೈಗೆ ಸಿಗದ ನೇಹಾ ಶೆಟ್ಟಿ ಗಲ್ಲಿ ರೌಡಿ, ಮೋಸ್ಟ್ ಎಲಿಜಿಬಲ್ ಬ್ಯಾಚುಲರ್ ಹೀಗೆ ಹಲವಾರು ಚಿತ್ರಗಳಿಗೆ ಬಣ್ಣ ಹಚ್ಚಿದ್ದಾರೆ. ಸದ್ಯ ಇತ್ತೀಚಿಗಷ್ಟೇ ಬಿಡುಗಡೆಯಾದ ‘DJ ಟಿಲ್ಲು’ ಸಿನಿಮಾದಲ್ಲಿನ ತಮ್ಮ ನಟನೆಗೆ ಎಲ್ಲ ರೀತಿಯ ಪ್ರೇಕ್ಷಕರಿಂದಲೂ ಪ್ರಶಂಸೆಗೊಳಗಾಗುತ್ತಿದ್ದಾರೆ ನೇಹಾ ಶೆಟ್ಟಿ. DJ ಟಿಲ್ಲುವಿನ ಯಶಸ್ಸಿನ ಸಂತಸದಲ್ಲಿ ಕುಣಿಯುತ್ತಿರೋ ಕುಡ್ಲದ ಕುವರಿಗೆ ಸಾಲು ಸಾಲು ಚಿತ್ರಗಳ ಬೇಡಿಕೆಗಳು ಬರುತ್ತಿವೆಯಂತೆ. ಸದ್ಯ ಈಕೆ ಟೋಲಿವುಡ್ ನ ಸ್ಟೈಲಿಶ್ ಸ್ಟಾರ್ ಅಲ್ಲು ಅರ್ಜುನ್ ಜೊತೆ ಬಣ್ಣ ಹಚ್ಚಿದ್ದಾರೆ. ಯಾವುದೇ ಸಿನಿಮಾಗಾಗಿ ಅಲ್ಲದಿದ್ದರೂ ಜೋಮ್ಯಾಟೋ ಸಂಸ್ಥೆಯ ಒಂದು ಜಾಹೀರಾತಿಗಾಗಿ ಅಲ್ಲು ಅರ್ಜುನ್ ಗೆ ಜೊತೆಯಾಗಿದ್ದಾರೆ. ಜೋಮ್ಯಾಟೋ ಸಂಸ್ಥೆಯ ರಾಯಭಾರಿಯಾಗಿರೋ ಅಲ್ಲು ಅರ್ಜುನ್ ಅವರು ಹಲವಾರು ಜಾಹೀರಾತುಗಳಲ್ಲಿ ಜೋಮ್ಯಾಟೋವಿನ ಪರ ನಟಿಸಿದ್ದಾರೆ. ಸದ್ಯ ನೇಹಾ ಶೆಟ್ಟಿ ಇವರೊಂದಿಗೆ ಕಂಡಿರುವುದು ನಟಿಯ ಅಭಿಮಾನಿಗಳಿಗೆ ಸಂತಸ ತಂದಿದೆ.

ತಮಿಳು, ಹಿಂದಿ, ಇಂಗ್ಲಿಷ್ ಭಾಷೆಗಳಲ್ಲಿ ನಟಿಸಿ ಮನೆಮಾತಾಗಿರುವ ಐಶ್ವರ್ಯ ರೈ ನಟನೆಯಲ್ಲಿ ಮಾತ್ರವಲ್ಲದೇ ಸುರಸುಂದರಿಯೂ ಹೌದು. 1994ರಲ್ಲಿ ವಿಶ್ವಸುಂದರಿ ಪಟ್ಟ ಗಿಟ್ಟಿಸಿಕೊಂಡ ಐಶ್ವರ್ಯ 1997ರಲ್ಲಿ ತಮಿಳು ಚಿತ್ರದ ಮೂಲಕ ಸಿನಿ ಕೆರಿಯರ್ ಆರಂಭಿಸಿದರು. 2007ರಲ್ಲಿ ನಟ ಅಭಿಷೇಕ್ ಬಚ್ಚನ್ ಅವರನ್ನು ವರಿಸಿದ ಐಶ್ವರ್ಯ ರೈ ಅವರಿಗೆ ಆರಾಧ್ಯ ಎಂಬ ಮಗಳಿದ್ದಾಳೆ. 48 ವಯಸ್ಸಿನ ಐಶ್ವರ್ಯ ರೈ ತಮ್ಮ ಮಾದಕ ಚೆಲುವಿನಿಂದ ಗಮನ ಸೆಳೆಯುವುದಂತೂ ನಿಜ. ತಮ್ಮ ಮನಮೋಹಕ ನೋಟ ಹಾಗೂ ಕಾಂತೀಯ ಕಣ್ಣುಗಳಿಗಾಗಿ ಅಭಿಮಾನಿಗಳನ್ನು ಹೊಂದಿದ್ದಾರೆ. ಇವರು ತಮ್ಮ ಸೌಂದರ್ಯ ಕಾಪಾಡಿಕೊಳ್ಳಲು ಹಲವು ನೈಸರ್ಗಿಕ ವಿಧಾನಗಳನ್ನು ಅನುಸರಿಸುತ್ತಿದ್ದು, ಒಂದಷ್ಟು ಟಿಪ್ಸ್ ಗಳನ್ನು ಕೂಡಾ ಹೇಳಿದ್ದಾರೆ. ಐಶ್ವರ್ಯ ರೈ ಕಡಲೆ ಹಿಟ್ಟು , ಅರಿಶಿನ ಹಾಗೂ ಹಾಲಿನೊಂದಿಗೆ ಪೇಸ್ಟ್ ತಯಾರಿಸಿ ಫೇಸ್ ಪ್ಯಾಕ್ ಆಗಿ ಮುಖಕ್ಕೆ ಬಳಸುತ್ತಾರೆ.ಇದರ ಜೊತೆಗೆ ಚರ್ಮವನ್ನು ತೇವಗೊಳಿಸಲು ಮೊಸರನ್ನು ಕೂಡಾ ಉಪಯೋಗಿಸುತ್ತಾರೆ. ತಮ್ಮ ಮುಖಕ್ಕೆ ಸೌತೆಕಾಯಿ ರಸವನ್ನು ಬಳಸುತ್ತಾರೆ ಎಂದು ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ ಐಶ್ವರ್ಯ ರೈ. ದೇಹವನ್ನು ಹೈಡ್ರೇಟ್ ಆಗಿ ಇಟ್ಟುಕೊಳ್ಳುವುದು ತಾನು ಫಾಲೋ ಮಾಡುವ ಸೌಂದರ್ಯ ವಿಧಾನಗಳಲ್ಲಿ ಒಂದಾಗಿದೆ ಎನ್ನುವ ಐಶ್ವರ್ಯ ರೈ ಸಾಕಷ್ಟು ನೀರು ಕುಡಿಯುತ್ತಾರೆ. ಮನೆಯಲ್ಲಿ ತಯಾರಿಸಿದ ಆಹಾರವನ್ನು ಇಷ್ಟಪಡುವ ವಿಶ್ವಸುಂದರಿ ಸರಿಯಾದ ಪೋಷಣೆ ಚರ್ಮ ಹಾಗೂ ಕೂದಲಿನ ಆರೋಗ್ಯಕ್ಕೆ ಉತ್ತಮವಾಗಿದೆ ಎಂದು ತಿಳಿದುಕೊಂಡಿದ್ದಾರೆ. ಸಂತೋಷವಾಗಿರುವುದು ನಮ್ಮ ಸೌಂದರ್ಯದ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿ ಐಶ್ವರ್ಯ ರೈ ಸದಾ ಸಂತೋಷವಾಗಿರಲು ಪ್ರಯತ್ನಿಸುತ್ತಾರೆ.

ಇಂದು ಕಲಾವಿದರು ಸಾಮಾಜಿಕ ಜಾಲತಾಣದಲ್ಲಿ ಸಕ್ರಿಯರಾಗಿರುವುದು ಹೊಸತೇನಲ್ಲ. ಈ ಮೂಲಕ ಜನರನ್ನು ಸುಲಭವಾಗಿ ತಲುಪಲು ಸಾಧ್ಯವಾಗುತ್ತದೆ. ಹೀಗಾಗಿ ಅನೇಕ ಮಂದಿ ಕಲಾವಿದರು ಯೂಟ್ಯೂಬ್ ಚಾನೆಲ್ ಶುರು ಮಾಡಿದ್ದಾರೆ. ತಮ್ಮ ಚಟುವಟಿಕೆಗಳನ್ನು ಜನರಿಗೆ ಮುಟ್ಟಿಸಲು ಇದು ನೆರವಾಗುತ್ತದೆ. ಈಗ ಕನ್ನಡ ಸಿನಿಮಾ ರಂಗದ ಮತ್ತೋರ್ವ ಕಲಾವಿದೆ ಯೂಟ್ಯೂಬ್ ಚಾನೆಲ್ ಶುರು ಮಾಡುತ್ತಿದ್ದಾರೆ. ಕನ್ನಡತಿ ಧಾರಾವಾಹಿಯಲ್ಲಿ ರತ್ನಮಾಲಾ ಆಲಿಯಾಸ್ ಅಮ್ಮಮ್ಮ ಪಾತ್ರದಲ್ಲಿ ಮಿಂಚಿದ್ದ ಚಿತ್ಕಲಾ ಬಿರಾದಾರ್ ಯೂಟ್ಯೂಬ್ ಚಾನೆಲ್ ಪ್ರಾರಂಭಿಸುತ್ತಿದ್ದಾರೆ. ಅಂದ ಹಾಗೇ ಅವರ ಯೂ ಟ್ಯೂಬ್ ಚಾನೆಲ್ ಇದೇ ಮಾರ್ಚ್ 8 ರಂದ ಆರಂಭವಾಗಲಿದೆ. ಇದರಲ್ಲಿ ಚಿತ್ಕಲಾ ಅವರು ಸಂಬಂಧ, ಅವರ ಜೀವನಾನುಭವ ಸೇರಿದಂತೆ ಹಲವು ವಿಷಯಗಳ ಕುರಿತು ಮಾಹಿತಿಯನ್ನು ಮುಂದಿನ ದಿನಗಳಲ್ಲಿ ಹೇಳಲಿದ್ದಾರೆ. ಈ ಹೊಸ ಪ್ರಯಾಣಕ್ಕೆ ನಿಮ್ಮ ಸಾಥ್ ಬೇಕು, ಹರಕೆ ಹಾರೈಕೆ ಬೇಕು ಎಂದಿದ್ದಾರೆ” ಚಿತ್ಕಲಾ ಬಿರಾದಾರ್. ಕನ್ನಡತಿ ಧಾರಾವಾಹಿಯ ಅಮ್ಮಮ್ಮ ಆಗಿ ಇಂದು ಕರ್ನಾಟಕದಾದ್ಯಂತ ಮನೆ ಮಾತಾಗಿರುವ ಚಿತ್ಕಲಾ ಅವರು ಇಂಗ್ಲೀಷ್ ಭಾಷೆಯಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುಚ ವಿಚಾರ ಹಲವರಿಗೆ ಗೊತ್ತಿಲ್ಲ! ಉಪನ್ಯಾಸಕಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದ ಈಕೆ ಆಕಸ್ಮಿಕವಾಗಿ ನಟನಾ ಕ್ಷೇತ್ರಕ್ಕೆ ಕಾಲಿಟ್ಟರು. ಬಂದೇ ಬರುತಾವ ಕಾಲ ಧಾರಾವಾಹಿಯ ಮೂಲಕ ನಟನಾ ಕ್ಷೇತ್ರದಲ್ಲಿ ಬಂದ ಈಕೆ ಅಗ್ನಿಸಾಕ್ಷಿ, ಅವನು ಮತ್ತೆ ಶ್ರಾವಣಿ, ನೂರೆಂಟು ಸುಳ್ಳು, ಬಾ ನನ್ನ ಸಂಗೀತ, ಮಾನಸ ಸರೋವರ ಸೇರಿದಂತೆ ಮೂವತ್ತಕ್ಕೂ ಹೆಚ್ಚು ಧಾರಾವಾಹಿಗಳಲ್ಲಿ ಅಭಿನಯಿಸಿದ್ದಾರೆ. ಸದ್ಯ ಅಮ್ಮಮ್ಮನಾಗಿ ಮೋಡಿ ಮಾಡುತ್ತಿರುವ ಈಕೆಯ ನಟನಾ ಪ್ರತಿಭೆ ಕೇವಲ ಕಿರುತೆರೆಗೆ ಮಾತ್ರ ಸೀಮಿತವಲ್ಲ, ಬದಲಿಗೆ ಹಿರಿತೆರೆಯಲ್ಲೂ ಈಕೆ ಮಿಂಚಿದ ಪ್ರತಿಭೆ. ಮದುವೆ ಮನೆ, ಸಂತು ಸ್ಟ್ರೇಟ್ ಫಾರ್ವರ್ಡ್, ಬಜಾರ್, ನರಗುಂದ ಬಂಡಾಯ, ಹಗಲುಕನಸು, ಮಾಯಾ ಬಜಾರ್, ಏನೆಂದು ಹೆಸರಿಡಲಿ, ತ್ರಿಬ್ಬಲ್ ರೈಡಿಂಗ್, ವಿಕ್ರಾಂತ್ ರೋಣ, ಯುವರತ್ನ, ಕಾಲಚಕ್ರ, ರಾಗಭೈರವಿ, ಪ್ರೇಮಂ ಪೂಜ್ಯಂ, ಸ್ಟೀಲ್ ಪಾತ್ರೆ ಸಾಮಾನು ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದಾರೆ.

ಸ್ಟಾರ್ ನಟರ ಮಕ್ಕಳು ಚಿತ್ರರಂಗ ಪ್ರವೇಶಿಸುವುದು ಹೊಸತೇನಲ್ಲ. ಬೋನಿ ಕಪೂರ್ ಹಾಗೂ ಶ್ರೀದೇವಿ ಹಿರಿಯಪುತ್ರಿ ಜಾಹ್ನವಿ ಆಗಲೇ ಚಿತ್ರರಂಗ ಪ್ರವೇಶಿಸಿದ್ದು ಇಲ್ಲಿ ನೆಲೆಯೂರಿದ್ದಾರೆ. ಈಗ ಎರಡನೇ ಪುತ್ರಿ ಖುಷಿ ಕಪೂರ್ ಸರದಿ. ಇಷ್ಟು ದಿನಗಳ ಕಾಲ ನಟನೆಯಿಂದ ದೂರವಿದ್ದ ಖುಷಿ ಕಪೂರ್ ಸದ್ಯದಲ್ಲೇ ಬಾಲಿವುಡ್ ಗೆ ಪ್ರವೇಶಿಸಲಿದ್ದಾರೆ. ಝೋಯಾ ಅಖ್ತರ್ ನಿರ್ದೇಶನದ ಈ ಸಿನಿಮಾ ಮುಂದಿನ ದಿನಗಳಲ್ಲಿ ಆರಂಭವಾಗಲಿದೆ. ಈ ವಿಚಾರವನ್ನು ಸ್ವತಃ ಖುಷಿ ಕಪೂರ್ ಅವರ ತಂದೆ ಬೋನಿ ಕಪೂರ್ ಸ್ಪಷ್ಟ ಪಡಿಸಿದ್ದಾರೆ. “ಎಪ್ರಿಲ್ ತಿಂಗಳಿನಿಂದ ಮಗಳು ಖುಷಿ ಶೂಟಿಂಗ್ ನಲ್ಲಿ ಭಾಗವಹಿಸಲಿದ್ದಾಳೆ. ಇದರ ಹೊರತಾಗಿ ಸಿನಿಮಾದ ಬಗ್ಗೆ ಬೇರೆ ಹೆಚ್ಚಿನ ಮಾಹಿತಿಯನ್ನು ಹೇಳಲು ಸಾಧ್ಯವಿಲ್ಲ” ಎಂದಿದ್ದಾರೆ ಬೋನಿ ಕಪೂರ್. ಇನ್ನು ಇದರ ಜೊತೆಗೆ ಅಮಿತಾಭ್ ಬಚ್ಚನ್ ಅವರ ಮೊಮ್ಮಗ ಅಗಸ್ತ್ಯನಂದ ಕೂಡಾ ಈ ಸಿನಿಮಾದ ಮೂಲಕ ಬಣ್ಣದ ಕ್ಷೇತ್ರಕ್ಕೆ ಕಾಲಿಡಲಿದ್ದಾರೆ ಎಂಬ ಮಾತು ಕೇಳಿಬರುತ್ತಿದೆ. ಇನ್ನು ಸೋಶಿಯಲ್ ಮೀಡಿಯಾದಲ್ಲಿ ಪಾಪ್ಯುಲರ್ ಆಗಿರುವ ಖುಷಿ ಕಪೂರ್ ಹೊಂದಿರುವ ಫಾಲೋವರ್ಸ್ ಗಳ ಸಂಖ್ಯೆ ಬರೋಬ್ಬರಿ ಏಳು ಲಕ್ಷ. ಇಂತಿಪ್ಪ ಈಕೆ ಇದೀಗ ನಟನೆಗೆ ಕಾಲಿಡಲಿದ್ದು ಇಲ್ಲಿ ಯಶಸ್ಸು ಕಾಣುತ್ತಾರಾ ಎಂದು ನೋಡಬೇಕಾಗಿದೆ.