ಇತರೆ

ಬಾಲಿವುಡ್ ನಲ್ಲಿ ಕೊರಿಯೋಗ್ರಾಫರ್ ಆಗಿ ನಂತರ ನಟನಾಗಿ ಬದಲಾದ ಸುಶಾಂತ್ ಪೂಜಾರಿ ಇದೀಗ ಜುಲೈನಲ್ಲಿ ತೆರೆಕಾಣಲಿರುವ ‘ಚೇಸ್’ ಸಿನಿಮಾ ಮುಖಾಂತರ ಸ್ಯಾಂಡಲ್ ವುಡ್ ಗೆ ಬರಲಿದ್ದಾರೆ. ಈ ಚಿತ್ರವನ್ನು ವಿಲೋಕ್ ಶೆಟ್ಟಿ ನಿರ್ದೇಶಿಸಿದ್ದಾರೆ. ಉಡುಪಿ ಮೂಲದವರಾದ ಸುಶಾಂತ್ ಚಿತ್ರದ ಬಗ್ಗೆ ಮಾತನಾಡುತ್ತಾ ‘ಕೆಜಿಎಫ್ ಯಶಸ್ಸು ಗಳಿಸುವುದಕ್ಕಿಂತ ಮೊದಲೇ ನಾನು ಕನ್ನಡ ಸಿನಿಮಾಗಳ ದೊಡ್ಡ ಪ್ರೇಮಿ. ಕನ್ನಡ ಸಿನಿಮಾದಲ್ಲಿ ನಟಿಸುವುದು ನನ್ನ ಬಹುದೊಡ್ಡ ಆಸೆಯಾಗಿತ್ತು. ಅದು ಈಗ ಚೇಸ್ ನ ಮೂಲಕ ನೆರವೇರುತ್ತಿದೆ’ ಎಂದರು. ಚೇಸ್ ಸಿನಿಮಾದಲ್ಲಿ ತಮ್ಮ ಪಾತ್ರವನ್ನು ವಿವರಿಸಿದ ಸುಶಾಂತ್ ‘ನಾನು ಇದರಲ್ಲಿ ರಾಧಿಕಾಳ ಗಂಡನಾಗಿ ನಟಿಸುತ್ತಿದ್ದೇನೆ. ಆ ಕ್ಷಣದಲ್ಲಿ ಜೀವಿಸುವ ಮತ್ತು ಯಾವುದರ ಬಗ್ಗೆಯೂ ಕಾಳಜಿ ವಹಿಸದ ಪಾತ್ರವದು. ನನ್ನ ಪಾತ್ರವು ಕಥೆಗೆ ಒಂದು ತಿರುವನ್ನು ತಂದು ಕೊಡುವುದಲ್ಲದೆ ಪ್ರೇಕ್ಷಕರಿಗೆ ಕುತೂಹಲವನ್ನು ಹುಟ್ಟಿಸುತ್ತದೆ. ನಾನು ಕನ್ನಡದಲ್ಲಿ ಕೆಲವು ಮಾತುಗಳನ್ನಷ್ಟೇ ಆಡಬಲ್ಲೆ. ಬೆನ್ನಿ ಡಯಾಲ್ ಹಾಗೂ ಕಾರ್ತಿಕ್ ಆಚಾರ್ಯ ಅವರು ಹಾಡಿರುವ ಶಲಲಾ ಲವ್ ಎನ್ನುವ ಹಾಡಿಗೂ ಹೆಜ್ಜೆ ಹಾಕಿದ್ದೇನೆ. ಇದರ ಶೂಟಿಂಗ್ ಮಂಗಳೂರಿನ ಕೆಲವು ಪ್ರಾಚೀನ ಸ್ಥಳಗಳಲ್ಲಿ ನಡೆದಿದೆ. ಅದೊಂದು ಸುಂದರ ದೃಶ್ಯ ಹಾಗೂ ನಾನು ಅದರ ಕೊರಿಯೋಗ್ರಾಫಿ ಮಾಡಿದ್ದೇನೆ’ ಎಂದರು. ಜೊತೆಗೆ ಸೆಟ್ ನಲ್ಲಿ ರಾಧಿಕಾ ನಾರಾಯಣ್ ಅವರೊಂದಿಗಿನ ಒಡನಾಟವನ್ನು ಹಂಚಿಕೊಂಡ ಸುಶಾಂತ್ ‘ಅವರೊಬ್ಬ ಅದ್ಭುತ ನಟಿ. ತುಂಬಾ ಬೇಗ ಹೊಂದಿಕೊಳ್ಳುವ ನಟಿ, ಹಾಗೆಯೇ ಅದ್ಭುತ ಡ್ಯಾನ್ಸರ್ ಕೂಡ ಹೌದು. ಶಾಲಲಾ ಲವ್ ಹಾಡಿನ ಚಿತ್ರೀಕರಣದ ವೇಳೆ ಸ್ಪಾಟ್ ಅಲ್ಲಿ ಡ್ಯಾನ್ಸ್ ಮಾಡುವಲ್ಲೂ ಯಶಸ್ವಿಯಾಗಿದ್ದಾರೆ’ ಎಂದು ಹೊಗಳಿದರು. ನಟನೆಯನ್ನು ತುಂಬ ಗಂಭೀರವಾಗಿ ಪರಿಗಣಿಸುವ ಸುಶಾಂತ್ ಕಿಶೋರ್ ಬಾಯ್ಝೋನ್ ನಿರ್ದೇಶನದ ಪ್ಯಾನ್ ಇಂಡಿಯಾ ಸಿನಿಮಾ ‘ಅರ್ಜುನ್’ ಗೂ ಸಹಿ ಹಾಕಿದ್ದಾರೆ. ‘ನನ್ನ ಕೆರಿಯರ್ ಒಬ್ಬ ಡ್ಯಾನ್ಸರ್ ಹಾಗೂ ಕೊರಿಯೋಗ್ರಾಫರ್ ಆಗಿ ಆರಂಭವಾದಂತದ್ದು. ಅದರಲ್ಲಿ ಯಶಸ್ಸನ್ನು ಕಂಡ ನನಗೆ ನಟನಾಗಿ ಹೊರಹೊಮ್ಮುವ ಅವಕಾಶ ಕೂಡ ಸಿಕ್ಕಿತು” ಎನ್ನುತ್ತಾರೆ. “ಕೊರಿಯೋಗ್ರಾಫಿಯನ್ನು ಬ್ಯಾಲೆನ್ಸ್ ಮಾಡುವ ಮೂಲಕ ಪೂರ್ಣ ನಟನಿಗೆ ಇಳಿದವನು ನಾನು. ಅಭಿನಯದಿಂದ ಜೀವನಕ್ಕೆ ಹಲವಾರು ಪಾಠಗಳು ಸಿಗುತ್ತವೆ. ಹಾಗೇ ಹೊಸಬರು ಪರಿಚಿತರಾದಂತೆ ಜೀವನದ ಸೌಂದರ್ಯ ಕೂಡ ಹೆಚ್ಚಾಗುತ್ತದೆ. ನಾನು ನಾನು ಇದನ್ನು ಸಂಪೂರ್ಣವಾಗಿ ಆನಂದಿಸುತ್ತಿದ್ದೇನೆ’ ಎಂದು ಹೇಳುತ್ತಾರೆ ಸುಶಾಂತ್ ಪೂಜಾರಿ‌.

ಜುಲೈ ಎಂಟರಂದು ತೆರೆ ಕಾಣಲಿರುವ ಕನ್ನಡದ ಹೊಸ ಸಿನಿಮಾ ‘ವೆಡ್ಡಿಂಗ್ ಗಿಫ್ಟ್’ ನಲ್ಲಿ ಬಹುಭಾಷಾ ನಟ ನಿಶಾನ್ ನಾಣಯ್ಯ ಅಭಿನಯಿಸಲಿದ್ದಾರೆ. ವಿಕ್ರಂ ಪ್ರಭು ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಚಿತ್ರದಲ್ಲಿ ಪ್ರೇಮ ಹಾಗು ಸೋನು ಗೌಡ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಮೂಲತಃ ಮಡಿಕೇರಿಯವರಾಗಿರುವ ನಿಶಾನ್ ಚಿತ್ರದ ಬಗ್ಗೆ ತಮ್ಮ ಅನಿಸಿಕೆಯನ್ನು ಹಂಚಿಕೊಂಡಿದ್ದಾರೆ. ‘ನನಗೆ ಮೊದಲನೆಯದಾಗಿ ಸ್ಕ್ರಿಪ್ಟ್ ತುಂಬಾ ಇಷ್ಟವಾಯಿತು. ವಿಕ್ರಂ ಪ್ರಭು ಚಿತ್ರರಂಗಕ್ಕೆ ಹೊಸದಾಗಿ ಕಾಲಿಡುತ್ತಿದ್ದಾರೆ. ಅವರಿಗೆ ಚಿತ್ರರಂಗದ ಬಗ್ಗೆ ಇರುವ ಒಲವು ಮತ್ತು ವಿವರಣೆಯ ಸಾಮರ್ಥ್ಯ ನನಗೆ ತುಂಬಾ ಹಿಡಿಸಿತು. ವೆಡ್ಡಿಂಗ್ ಗಿಫ್ಟ್ ಸಿನಿಮಾದ ಮೂಲಕ ಕನ್ನಡ ಚಿತ್ರರಂಗದಲ್ಲಿ ಅಭಿನಯಿಸುತ್ತಿರುವುದು ತುಂಬಾ ಖುಷಿ ನೀಡಿದೆ’ ಎಂದರು. ಚಿತ್ರದಲ್ಲಿ ತಮ್ಮ ಪಾತ್ರದ ಬಗ್ಗೆ ಮಾತನಾಡುತ್ತಾ ‘ಬಿಲಾಸ್ ರಾವ್ ಎನ್ನುವ ಸೆಲ್ಫ್ ಮೇಡ್ ಕ್ಯಾರೆಕ್ಟರ್ ನಲ್ಲಿ ಕಾಣಿಸಿಕೊಳ್ಳಲಿದ್ದೇನೆ. ಔಷಧೀಯ ವ್ಯವಹಾರ ಮಾಡುವ ಈತನಿಗೆ ಪ್ರೇಮವಾಗುತ್ತದೆ. ಆದರೆ ನಂತರ ಪ್ರೀತಿಯು ವಿಚಿತ್ರವಾದ ತಿರುವನ್ನು ಪಡೆದುಕೊಳ್ಳಲಿದ್ದು ಬಂಧನ ಮತ್ತು ನಾಟಕೀಯ ಸನ್ನಿವೇಶಗಳೊಂದಿಗೆ ಸಿನಿಮಾ ಮುಂದುವರಿಯಲಿದೆ’ ಎಂದರು. ಸ್ಯಾಂಡಲ್ ವುಡ್ ನಲ್ಲಿ ಕೆಲಸ ಮಾಡಿದ ಬಗ್ಗೆ ತಮ್ಮ ಅನುಭವವನ್ನು ಹೇಳಿದ ನಿಶಾಂತ್ ’45 ದಿನಗಳ ಚಿತ್ರೀಕರಣ ಮರೆಯಲಾಗದಂತದ್ದು. ಚಿತ್ರೀಕರಣದ ಭಾವನೆ ಯಾವತ್ತೂ ಬಂದಿಲ್ಲ. ಅಚ್ಯುತ್ ಕುಮಾರ್, ಪ್ರೇಮ, ಸೋನು ಗೌಡ ಅವರೊಂದಿಗೆ ಅಭಿನಯಿಸುವಾಗ ಕುಟುಂಬದ ಭಾವ ದೊರೆತಿದೆ. ಇನ್ನೂ ಈ ಇಂಡಸ್ಟ್ರಿಯಲ್ಲಿ ಕೆಲಸ ಮಾಡಲು ಉತ್ಸುಕನಾಗಿದ್ದೇನೆ’ ಎಂದರು.

ಭಾರತೀಯ ಚಿತ್ರರಂಗಕ್ಕೆ ಸ್ವಂತವಾಗಿರುವ ನಟ ಕಮಲ್ ಹಾಸನ್ ಅವರು. ವಿವಿಧ ಭಾಷೆಗಳಲ್ಲಿ ವಿವಿಧ ಪಾತ್ರಗಳನ್ನು ನಿರ್ವಹಿಸಿರುವ ಈ ದಿಗ್ಗಜನ 232ನೇ ಸಿನಿಮಾ ‘ವಿಕ್ರಮ್’. ಜೂನ್ 3ನೇ ತಾರೀಕಿನಂದು ತೆರೆಕಂಡಂತಹ ಈ ಚಿತ್ರ ಪ್ರಪಂಚದಾದ್ಯಂತ ಸಿನಿರಸಿಕರ ಮನಸೆಳೆಯುವಲ್ಲಿ ಯಶಸ್ವಿಯಾಗಿತ್ತು. ಆಕ್ಷನ್-ಡ್ರಾಮಾ ರೀತಿಯ ಈ ಸಿನಿಮಾ ಈಗಲೂ ಕೂಡ ಚಿತ್ರಮಂದಿರಗಳಲ್ಲಿ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ತಮಿಳು ಚಿತ್ರರಂಗದ ಖ್ಯಾತ ನಿರ್ದೇಶಕರಾದ ಲೋಕೇಶ್ ಕಣಗರಾಜ್ ಅವರ ಸೃಷ್ಟಿಯಾಗಿರೋ ಈ ‘ವಿಕ್ರಮ್’ ಸಿನಿಮಾ ಇದೀಗ ಅಭಿಮಾನಿಗಳು ಹಾತೊರೆದು ಕಾಯುತ್ತಿದ್ದಂತಹ ನಿರ್ಧಾರವನ್ನ ತೆಗೆದುಕೊಂಡಿದೆ. ತನ್ನ ಒಟಿಟಿ ಓಟ ಆರಂಭವಾಗೋ ದಿನಾಂಕವನ್ನ ಅಧಿಕೃತವಾಗಿ ಘೋಷಣೆ ಮಾಡಿದೆ. ‘ಕೈಥಿ’, ‘ಮಾಸ್ಟರ್’ ಸೇರಿದಂತೆ ತಮಿಳು ಚಿತ್ರರಂಗಕ್ಕೆ ಮೂರು ಹಿಟ್ ಚಿತ್ರಗಳನ್ನ ಕೊಟ್ಟಂತಹ ಲೋಕೇಶ್ ಕಣಗರಾಜ್ ಅವರ ನಿರ್ದೇಶನದ ನಾಲ್ಕನೇ ಸಿನಿಮಾ ಇದಾಗಿದೆ. ಇದರ ತಾರಾಗಣ ಕೂಡ ಸಿನಿರಸಿಕರ ಮೈಗೆ ರೋಮಾಂಚನ ನೀಡುವಂತದ್ದು. ದಿಗ್ಗಜ ಕಮಲ್ ಹಾಸನ್ ಅವರ ಜೊತೆಗೆ ವಿಜಯ್ ಸೇತುಪತಿ, ಮಲಯಾಳಂನ ಫಹಾದ್ ಫಾಸಿಲ್, ಅರ್ಜುನ್ ದಾಸ್, ಶಿವಾನಿ ನಾರಾಯಣ್ ಹಾಗು ವಿಶೇಷ ಪಾತ್ರವೊಂದರಲ್ಲಿ ಸೂರಿಯ ಅವರು ಕೂಡ ಕಾಣಿಸಿಕೊಂಡಿದ್ದರು. ಎಲ್ಲೆಡೆ ಜನಮನ್ನಣೆ ಪಡೆದ ಈ ಸಿನಿಮಾ ಇದೇ ಜುಲೈ 8ರಿಂದ ‘ಡಿಸ್ನೆಯ್ ಪ್ಲಸ್ ಹಾಟ್ ಸ್ಟಾರ್(DISNEY+ HOTSTAR)’ ನಲ್ಲಿ ಪ್ರದರ್ಶನ ಕಾಣಲಿದೆ. ತಮಿಳಿನ ಜೊತೆಗೆ, ತೆಲುಗು, ಮಲಯಾಳಂ, ಹಿಂದಿ ಹಾಗು ಕನ್ನಡ ಭಾಷೆಗಳಲ್ಲೂ ಲಭ್ಯವಾಗಲಿದೆ. ಸದ್ಯ ತಮಿಳು ಚಿತ್ರರಂಗದಲ್ಲಿ ಬಹುಬೇಡಿಕೆಯ ಹಾಗು ಬಹುಭರವಸೆಯ ನಿರ್ದೇಶಕರಲ್ಲಿ ಲೋಕೇಶ್ ಕಣಗರಾಜ್ ಅವರು ಮುಂಚೂಣಿಯಲ್ಲಿದ್ದಾರೆ. ‘ವಿಕ್ರಮ್’ ಸಿನಿಮಾವನ್ನ ಚಿತ್ರಮಂದಿರಗಳಲ್ಲಿ ಕಂಡಂತಹ ಪ್ರೇಕ್ಷಕರು ಇದು ಲೋಕೇಶ್ ಅವರದೇ ಚಿತ್ರವಾದ ‘ಕೈಥಿ’ಯ ಅಂಶಗಳನ್ನೆಲ್ಲ ಇಟ್ಟುಕೊಂಡಿದೆ, ಒಂದು ರೀತಿಯಲ್ಲಿ ‘ಕೈಥಿ’ ಸಿನಿಮಾದ ಮುಂದುವರೆದ ಭಾಗವಾಗಿದೆ ಎನ್ನುತ್ತಿದ್ದಾರೆ. ಹಾಗಾಗಿ ಈ ಎಲ್ಲ ಸಿನಿಮಾಗಳನ್ನ ಇಟ್ಟುಕೊಂಡು ಲೋಕೇಶ್ ಅವರು ತಮ್ಮದೇ ಸಿನಿಮಾಟಿಕ್ ಯೂನಿವರ್ಸ್(CINEMATIC UNIVERSE) ಮಾಡಲಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿದ್ದೂ, ಇದನ್ನು ಸ್ವತಃ ಲೋಕೇಶ್ ಅವರು ಕೂಡ ಒಪ್ಪಿಕೊಂಡಿದ್ದಾರೆ. ಕಮಲ್ ಹಾಸನ್ ಅವರ ಈ ಉತ್ತಮ ಸಿನಿಮಾವನ್ನ ಚಿತ್ರಮಂದಿರಗಳಲ್ಲಿ ನೋಡಲಾಗದೆ ಇದ್ದವರು ಇದೇ ಜುಲೈ 8ರಿಂದ ‘ಹಾಟ್ ಸ್ಟಾರ್’ ಆಪ್ ನಲ್ಲಿ ಐದು ಭಾಷೆಗಳಲ್ಲಿ ನೋಡಬಹುದಾಗಿದೆ.

ಕನ್ನಡದ ಹೆಸರಾಂತ ನಟ ದುನಿಯಾ ವಿಜಯ್ ಅವರು ಮೊದಲ ಬಾರಿ ನಿರ್ದೇಶಕರ ಕುರ್ಚಿ ಏರಿದ ಸಿನಿಮಾ ‘ಸಲಗ’. ಅಂಡರ್ ವರ್ಲ್ಡ್ ಲೋಕದ ಕಥೆ ಹೇಳುವಂತಹ ಈ ಚಿತ್ರ ಚಿತ್ರಮಂದಿರಗಳಲ್ಲಿ ಬ್ಲಾಕ್ ಬಸ್ಟರ್ ಆಗಿತ್ತು. 2021ರ ಅಕ್ಟೋಬರ್ 14ರಂದು ತೆರೆಕಂಡಿದ್ದ ಈ ಸಿನಿಮಾ ಸಿನಿರಸಿಕರ ಮೆಚ್ಚುಗೆ ಪಡೆದಿತ್ತು. ಕರ್ನಾಟಕದ ಹಲವು ಕಡೆಗಳಲ್ಲಿ ಭರ್ಜರಿ 100 ದಿನಗಳ ಪ್ರದರ್ಶನ ಪಡೆದು ಬಾಕ್ಸ್ ಆಫೀಸ್ ನಲ್ಲಿ ಉತ್ತಮ ಗಳಿಕೆ ಕಂಡಿತ್ತು. ಇದೀಗ ಸಿನಿಮಾ ಬಿಡುಗಡೆಯಾಗಿ ಎಂಟು ತಿಂಗಳ ನಂತರ ಒಟಿಟಿ ಕಡೆಗೆ ಚಿತ್ರ ಹೊರಟಿದೆ. ಚಿತ್ರಮಂದಿರಗಳಲ್ಲಿ ಸಿನಿಮಾವನ್ನು ನೋಡಲು ಆಗದೆ ಇದ್ದವರು, ನೋಡಿದವರ ಮಾತುಗಳನ್ನು ಕೇಳಿ ಚಿತ್ರ ನೋಡಲು ಉತ್ಸುಕರಾಗಿದ್ದರು. ಯಾವಾಗ ಒಟಿಟಿ ಗೆ ಬರುತ್ತದೆ, ಯಾವುದರಲ್ಲಿ ಬರುತ್ತದೆ ಎಂಬ ಪ್ರಶ್ನೆ ಎಲ್ಲರಲ್ಲೂ ಇತ್ತು. ಆದರೆ ಚಿತ್ರತಂಡ ನಮ್ಮ ಚಿತ್ರ ಚಿತ್ರಮಂದಿರಗಳಲ್ಲಿ ಮಾತ್ರ ನೋಡಲು ಸಾಧ್ಯ. ಸದ್ಯಕ್ಕೆ ಯಾವುದೇ ಒಟಿಟಿ ತಾಣಗಳಲ್ಲಿ ಬರೋದಿಲ್ಲ ಎಂದು ಸಿನಿಮಾ ಬಿಡುಗಡೆಯಾದ ಸಂಧರ್ಭದಲ್ಲಿ ಖಡಾಖಂಡಿತವಾಗಿ ಹೇಳಿದ್ದರು. ಇದೀಗ ‘ಸಲಗ’ ಸಿನಿಮಾದ ಒಟಿಟಿ ಬಿಡುಗಡೆಯ ಸುದ್ದಿ ಹೊರಬಿದ್ದಿದೆ. ‘ಸನ್ ನೆಕ್ಸ್ಟ್(SUN NXT)’ ಆಪ್ ನಲ್ಲಿ ಸಿನಿಮಾ ಬಿಡುಗಡೆಯಾಗುತ್ತಿದ್ದು, ಜುಲೈ ತಿಂಗಳಿಗೆ ಬಿಡುಗಡೆಯಾಗುತ್ತಿದೆ. ಬಹುನಿರೀಕ್ಷಿತ ‘ಸಲಗ’ ಸಿನಿಮಾ ‘ಸನ್ ನೆಕ್ಸ್ಟ್(SUN NXT)’ ನಲ್ಲಿ ಬರುತ್ತಿರುವುದು ಅಭಿಮಾನಿಗಳಿಗೆ ಸಂತಸ ತಂದಿದೆ. ದುನಿಯಾ ವಿಜಯ್ ನಿರ್ದೇಶಿಸಿ, ನಟಿಸಿದಂತಹ ಈ ಚಿತ್ರದಲ್ಲಿ ಸಂಜನಾ ಆನಂದ್, ಡಾಲಿ ಧನಂಜಯ, ಯಶ್ ಶೆಟ್ಟಿ, ಅಚ್ಯುತ್ ಕುಮಾರ್, ರಂಗಾಯಣ ರಘು ಸೇರಿದಂತೆ ಹಲವು ಹೆಸರಾಂತ ಮೇರು ನಟರು ನಟಿಸಿದ್ದಾರೆ. ಚಿತ್ರಮಂದಿರಗಳಲ್ಲಿ ಹವಾ ಎಬ್ಬಿಸಿದ ಸಿನಿಮಾ ಇದೀಗ ‘SUN NXT’ ನಲ್ಲಿ ಪ್ರದರ್ಶನ ಕಾಣಲು ಸಿದ್ಧವಾಗಿದೆ.

ಕನ್ನಡದ ಸಿನಿರಸಿಕರಿಗೆ ಒಂದಷ್ಟು ನಿರ್ದೇಶಕರು ಅಥವಾ ನಟರು ತಮ್ಮ ಮುಂದಿನ ಸಿನಿಮಾ ಘೋಷಿಸುತ್ತಿದ್ದಾರೆ ಎಂದರೆ ಎಲ್ಲಿಲ್ಲದ ಸಂತಸ ಹುಟ್ಟುತ್ತದೆ. ಈ ಸಾಲಿನ ನಟ-ನಿರ್ದೇಶಕರಲ್ಲಿ ಮೊದಲಿಗರು ರಿಯಲ್ ಸ್ಟಾರ್ ಉಪೇಂದ್ರ ಅವರು. ಉಪ್ಪಿ ಅವರ ನಿರ್ದೇಶನಕ್ಕೆ ಪ್ರತ್ಯೇಕವಾದ ಅಭಿಮಾನಿ ಬಳಗವಿದೆ. ‘ಓಂ’, ‘ಉಪ್ಪಿ’, ‘ಉಪ್ಪಿ 2’ ಸೇರಿದಂತೆ ಹಲವು ಸೂಪರ್ ಹಿಟ್ ಸಿನಿಮಾಗಳನ್ನು ಕನ್ನಡಿಗರಿಗೆ ನೀಡಿರುವ ಉಪೇಂದ್ರ ಅವರು ಇದೀಗ ಹೊಸ ಚಿತ್ರವನ್ನು ಕೈಗೆತ್ತಿಕೊಂಡಿದ್ದಾರೆ. ಅದುವೇ ‘ಉಪ್ಪಿ 3’ ಎಂದೇ ಕರೆಸುಕೊಳ್ಳುತ್ತಿರುವ ‘ಯು ಐ’. ಸದ್ಯ ಈ ಸಿನಿಮಾದ ನಾಯಕಿಯನ್ನು ಚಿತ್ರತಂಡ ಆಯ್ಕೆ ಮಾಡಿದೆ. ಬರೋಬ್ಬರಿ ಏಳು ವರ್ಷಗಳ ನಂತರ ಉಪೇಂದ್ರ ಅವರು ನಿರ್ದೇಶನ ಮಾಡುತ್ತಿರೋ ಚಿತ್ರ ‘ಯು ಐ’. ಹಾಗಾಗಿ ಸಿನಿಮಾದ ಮೇಲೆ ನಿರೀಕ್ಷೆ ಹೆಚ್ಚಾಗೆ ಇದೆ. ಸದ್ಯ ಕೆಜಿಎಫ್ ಚಿತ್ರಗಳ ನಾಯಕಿ, ರಾಕಿ ಭಾಯ್ ನ ಮನದರಸಿ, ರೀನಾ ಆಗೇ ಎಲ್ಲೆಡೆ ಪರಿಚಿತವಾಗಿರೋ ಶ್ರೀನಿಧಿ ಶೆಟ್ಟಿ ಅವರನ್ನು ಸಿನಿಮಾದ ನಾಯಕಿಯಾಗಿ ಚಿತ್ರತಂಡ ಆರಿಸಿಕೊಂಡಿದೆ. ಶ್ರೀನಿಧಿ ಶೆಟ್ಟಿ ಅವರನ್ನು ಕಥೆಯ ಒಬ್ಬ ನಾಯಕಿಯಾಗಿ ತಮ್ಮ ತಂಡಕ್ಕೆ ‘ಯು ಐ’ ಆಹ್ವಾನಿಸಿಕೊಂಡಿದ್ದು, ಇನ್ನು ಯಾರ್ಯಾರು ಸೇರಲಿದ್ದಾರೆ ಎಂದು ಅಭಿಮಾನಿಗಳು ಕುತೂಹಲದಿಂದ ಕಾಯುತ್ತಿದ್ದಾರೆ. ಜೂನ್ 28ರಂದು ಸಿನಿಮಾದ ಚಿತ್ರೀಕರಣ ಆರಂಭವಾಗಿದ್ದು, ಹೆಚ್ಚಿನ ಮಾಹಿತಿಗಳಿಗಾಗಿ ಕಾದು ನೋಡಬೇಕಿದೆ.